Mexicomi toqutaasimasut timerpassui nassaaraat
Politiit sakkutuullu timinik nunamut assaassanik allanik ujaasipput, timinillu assaanneqarsimasunik amerlanernik nassaarnissartik ilimanarsinnaanerarpaat.
Toqutaasimasut 51-it timaat nassaarineqartut, illoqarfiup Monterrey-ip eqqaani, ataatsimoortillugit assaassani arfineq-marlunni, nassaarineqarput.
Pisortanit unnerluussisartuneersoq oqarpoq, timinik ataatsimoortillugit assaassanik ikinnerpaamik suli marlunnik nassaarnissartik pasitsaakkitsik.
Oqartussat nuna assallugu aallartippaat, ikiaroornartunik sakkortuunik tuniniaasartoqatigiinnit nunap tamassuma toqutaminnik nunamut assaassisarfittut atorneqarnera, kinaanerminik isertuussisumit misissuiffigeqquneqareersorlu. Timit nassaarineqartut, ikiaroornartunik tuniniaasartut oqartussallu piffissami sivisuumi sorsuunneranni toqutaasuussangatinneqarput.
Timit toqungasut nassaarineqartut ikuallanneqartarsimagunarput, ilaasalu naalliutsitaasarsimanerannik takussutissaqartoq oqaatigineqarluni.
Toqutaasimasut timaat 50-init amerlanerusut aatsitassarsiorfiusimasumi, illoqarfiup takornariarfiusartup Taxcop eqqaani politiit juunimi nassaaraat.
Mexicomi aaqqissuussamik pinerlunniartarnernut atatillugu, 2006-imiilli maannamut inuit 25.000-init amerlanerusut toqutaasimassangatinneqarput.
