Mette Frederiksen ajugaanermi kingorna: Danmarkimi nutaanik naalakkersuisoqalissaaq

- Asasakka tamassi. Asasakka socialdemokraatit. Siullermik, asasakka danskit, kiisami ilissi pisussanngorpusi. Danmarkip allanik siuttoqalernissaa qinerparsi. Danmarkip allanik naalakkersuisoqalernissaa qinerparsi.

Socialdemokraatit siulittaasuat Mette Frederiksen partiit Christiansborgimi kateriffiani taama oqarpoq. 

Socialdemokraatit 2015-imi qinersinermut naleqqiullugu qinigaatitamikkut ataatsimik siuariarput, partiillu saamerliit katillugit 91-inik qinigaatitaqalerput talerperliillu 79-inik. 

Mette Frederiksen taamaalilluni naalakkersuisunngortitsisinnaalerpoq. Socialdemokraatit kisimiillutik naalakkersuisunngortitsinissaat salliutillugu oqaatigisimavaa, imaaliallaannarlunili tamanna anguneqarsinnaanngitsoq aamma oqaatigalugu. 

-  Ajornakusuussaaq. Parteerpassuuvugut sunniuteqaqataarusuttut, tamarmillu aamma sunniuteqaqataasariaqarput.

AAMMA ATUARUK Lars Løkke Rasmussenip ajorsarnini nassuerutigaa ministeriunertulli ingerlaqqikkumalluni

- Socialdemokraatinik qinersisunuinnaq ministeriunerorusunngilanga. Ministeriuninngussaguma Danmarkimut tamarmut ministeriunerussaanga, taamaaliussagumalu Lars Løkkemut naleqqiullugu assaga isaannerusariaqassavara.

Lars Løkke Rasmussenip (V) socialdemokraatit naalakkersuisooqatigilerusullugit oqaatigisimavaa - tamannalu aamma partiit siuttuisa oqallitsinneqarnerini aalajangiusimallugu: 

-  Neqeroorutigisara suli atuuppoq, Løkke oqarpoq.

Mette Frederiksenilli tamanna itigartitsissutigaa:

- Venstre qinersinermi angusarissaarpoq, qinersisartullu suleqatigiittariaqarnitsinnik isumaqarnerattut nalilerpara, Mette Frederiksen oqarpoq.