Ministeriunerup De Radikale Venstrekkut qinersisoqarnissaanik piumasaqaataat oqaaseqarfigiumanngikkaa
Folketingemi partiit oqaasii tusarnaarlugit De Radikale Venstrekkulli oktoberip ulluisa sisamaanni qinersisoqarnissaanik piumasaqaataat oqaaseqarfigiumanagu, Danmarkimi ministeriuneq Mette Frederiksen TV-2-mut oqarpoq.
Danmarkimi minkit tamarmik toqorarneqarnissaannik aalajangiisoqarsimaneranik minkit pillugit ataatsimiititaliarsuarmit ilaatigut ministerniuneq atorfilittallu aalajangernermi qitiusut inissisimasut sakkortuumik isornartorsiorneqareersullu, Radikalit taama piumasaqarput.
Ministerit akisussaasuunerat ataatsimiititaliarsuarmit isummerfigineqanngilaq, inatsit malillugu isummertussaanngimmat.
AAMMA ATUARUK Ministeriunerup eqqartuussissuserisut misissuisariaqannginnerarai
Taamaammat folketingemi partiit talerperliit minkit toqorarneqarnerannut tunngasoq naalakkersuinermi akisussaasumut eqqartuussivimmut suliassanngortinneqassanersoq eqqartuussissuserisunut arlaannaannulluunnit attuumassuteqanngitsunut nalilertussanngortikkusuppaat.
Misissuisitsisoqassappat Folketingemi radikalit ilaasortaatitaat aalajangiisussatut inissisimapput.
Eqqartuussissuserisulli arlaannaannulluunnnit attuumassuteqanngitsut misissuinissaannut tapersersuinatik, Radikalit siulersuisuuneri arfininngornermi ataatsimeereernerminni nalunaarput.
Misissuisitsinissaq pinnagu ministeriunerup qinersisitsinissamik nalunaaruteqarnissaa piumasaraat.
Mette Frederiksen qinersinissamik nalunaaruteqanngippat tatiginnikkunnaarnermik nalunaaruteqarnissaq, De Radikalinit piumasariniarneqarpoq. De Radikale Venstret naalakkersuisut uppitissinnaavaat.