Meeravallaarluni aallartitaaneq artukkiisarpoq
KNR-ip 1960-70-kkunni meeqqat Danmarkimi ukiisarnerisa pitsaaqutai ajoqutaalu misissorpai.
-Meeraavallaaqaat, isumaqarluinnarpunga ajornanngippat meeraq 14-leereertinnagu angajooqqaaviniit qimagutitinneqassanngitsoq.
Tarnip nakorsaa Ernst Peilmann oqarpoq.
Meeqqat qulaaluaniit 13-nut ukiullit 1500-it sinnillit kisimiitillugit aallartinneqarsimanerat apeqqusernarpoq, ukiut taakku meeqqat ineriartornerannut timikkut tarnikkullu pisoqarfiunerpaasutut oqaatigineqarsinnaapput, meeqqap kinaassusaa tassani piffissami saqqummilertarpoq, kulturillu allap iserfiginerani kinaassutsimut nalornilersoqarsinnaavoq. Tarnip nakorsaa Ernst Peilmann nangilluni oqarpoq.
Meeqqat nukittuut toqqammavigissaartut ukiinertik iluaqutigiinnassavaat, apeqqutaalluni meeraq angajoqqaarsiaminit iluamik pineqarsimaneq.
Ajunngitsumillu pineqarneq Miki Ole Henriksen-ip 1966-mi aqqanilinnik ukioqarluni ukiiartortup puigunngisaannarpaa. Angerlarsimaffimmini immikkoorsitaallunilu unatagaasarsimasoq Danmarkimi angajoqqaarsiaminit asaneqarpoq piginnaasanilu siornatigut nalusimasani nassaariortorpai.
-Sunaaffa taamak eqaatsigivunga, tassa taanna misigisara sammisaqarneq soorlu timersornerit, inunnik allanik ilaqarnerit asiarnerit inersimasunik oqaloqateqarsinnaaneq, tassa tamakku nuannersuupput assortorneqaannarani kisianni aamma tusarnaarneqarneq, taavalu pissutsinik oqaluttuunneqarsinnaaneq taanna aamma nuannersuuvoq, tassa meeraq nutaaq Danmarkimiilerama, Miki Ole Henriksen oqaluttuarpoq.
Meeqqat ilaasa angajoqqaarsiaminni immikkoorsitaaneq, usorutsitaaneq, kinaassusiiagaanerlu misigaat Søren Hans Lyngep pisimasut ukiut 40-ngajaat eqqartorsimanngilai angerlalerninilu puigunngisaanarlugu.
- Puigorneq ajorpara taamanikkut ministeriaqarfimmiit aatikkatta angerlariartulerluta qullikka unissinnaanngillat qiangaarama nuannaarnerup pianik qiarujussuarlunga eqqaamavara, qimakkakkit takoqqinnaviarnagillu tassalu qaamasuinnarmut ingerlanernera taamanikut puigorneq ajorpara.
