Meerartagut uippakajaartarnersut naluarput
Nunani avannarlerni meeqqat quliugaangata ataaseq stressernerup, tassalu uippakajaarnerup ilisarnaataanik atugaqartarpoq, meeqqat anniaateqartarnerat uippakajaartarnerallu pillugit nunarsuarmi ilisimatusartut ilaat oqarpoq.
Meeqqat uippakajaartarnerannut ilisarnaatit tassaasinnaapput niaqorluttarneq, naakkut avatikkullu anniaateqarnerit, ilisimajunnaartarneq, isigisat allanngortarnerat kiisalu aalajangersimasumik sammisaqarsinnaannginneq.
Nunatsinni meeqqat uippakajaarnermik eqqugaasinnaanerat pillugu misissuisoqarnikuunngilaq, Dronning Ingridilli napparsimmavissuani meeqqat nakorsaata Britta Olsenip meeqqat uippakajaarnerup ilisarnaataanik atugaqartut naammattoortarnerarpai.
Meeqqat naarluttut, sapaatip akunneranut ataasiaq marloriaq naarlullutik atuarsimanngitsut, nakorsat naammattoorsinnaasarpaat. Ilaatigullu paasineqartarpoq arlaannik napparsimasut, ilaatigulli imaassinnaasarpoq atuarfimmi qinngasaarneqartarnermik kingorna taama misigisimasut. Aammali angerlarsimaffimminni annertuumik ajornartorsiuteqarnerup kingorna taama misigisimalersinnaasarput. Immaqa ataata imersimatilluni sakkortusaarsinnaasarmat, immaqalu meeqqat malugisinnaasaramikku anaanartik anniartoq allamilluunnit ajornartorsiuteqartoq. Toqqissisimannginnerup ersinerullu meeqqat uippakajaartilersinnaasarpaat.
Meeqqat periarfissaqanngikkaangamik angerlarsimaffimminni toqqissisimanissaminnut, eqqaminniittunullu oqaluttuarisinnaanngikkaangamikku qanoq misigisimanerlutik. Misigisimagunillu ajornartorsiutimik qaangernissaanut ikiorneqaratik taava meeqqat nammineerlutik nassuiaasertarpaat naarlunnertut imaluunniit timimikkut allakkut anniaatitut. Meeqqanilu anginerni naammattoorneqarsinnaasarpoq anersaartornermikkut ippigisaqartut ilaallu ilisimajunnaarsinnaasarput, misigissutiminnik oqaatigisinnaannginnermi kingorna.
Britta Olsen aamma oqarpoq meeqqat uippakajaartutut taaneqarsinnaasut tassaasartut Dronning Ingridip Napparsimmavissuanut qaammatit marluk pingasut allortarlugit unitsinneqartartut.
Uippakajaarneq meeqqat ilikkagaqarsinnaanerannut aamma killiliisinnaasarpoq.
