Meerarsiaq annivimminiilerpoq
Tamatumunnga peqatigitillugu angajoqqaarsiaasut suliassap paamaarunneqarnera naammagittaalliuutigaat, nuutsitsinermi tamatuma kinguneranik meeqqap ineriartornerani piffissami naleqqutinngitsumi pimmat.
Nukappiaraq pineqartoq aaneqarnissaminit ullunik marlunnik sioqqutsisumik aaneqarpoq. Tassa annivia Danmarkimi efterskolerfimminit ippassaq tikiinnarluni meeqqani aagamiuk.
Angajoqqaarsiaasut Ilaqutariinnermut Pitsaaliuinermullu Aqutsisoqarfimmut naammagittaalliuuteqareerput, naammagittaalliuutiminnilu Qeqqata Kommunia meeqqamik sumiginnaasutut unnerluutigaat.
- Suliaq imminiiginnarusunngilarput. Qanorlu iliornissarput pillugu eqqartuussissuserisorput aqagu oqaloqatigissavarput. Kalaallit Nunaanni meerarsianngortitsinermi taama pisoqaqqittariaqanngilaq, meeqqamut pitsaanerusussap sianigineqarnissaa eqqarsaatigaarput, meeqqamullu taamatut pissusilersortoqaqqinnginnissaa neriuutigaarput, meeqqap arnarsiarisimasaa Radioaviisimut oqarpoq.
