Meerarsianit avissaarnissaq misigissutsinik attuisaqaaq
Taamatut tusartinneqarsinnaasutut misigissutsimikkut attortissimaqisut ilagaat Albrecht Skifte-kut Maniitsumeersut, qulinik, arfinilinnik kiisalu tallimanik ukiulimmik, 2007-mi septembarimiit meerarsiaqaqqilersut.
Angajoqqaarsiat 30-t sinerissameersut Sisimiuni novembari aallartilaartoq pikkorissartinneqarmata taakku peqataapput. Eqqartorneqartut ilagaat meerarsiat ullormiit ullormut aalajangiinikkut
angajoqqaavimminnut angerlartinneqarsinnaane-rat. Tamanna misigissutsinik attuisarpoq:
-Eqqarsaatiginngitsoortaratsigu meeqqap uternissaa, sillimaffiginngikkaanni misigissutsitigut aamma sakkortoorujussuusinnaasarami, uagut angajoqqaarsiat aamma eqqugaasaratta, tassa misigissuseqarfigilereerlugit ullormiit ullormut qimagutsinneqartarput. Maaniinngaanngitsoq, sineriassuarmi aamma taanna atuuppoq. Tassa uagut allattugaatigilerparput siunnersuutiginiarlugu meeraq angerlartinniarneqarpat sivikinnerpaamik qaammatip ataatsip ingerlanerani piareersartariaqartugut. Arlalissuuvugut misigissuseqarfigileriikkagut inuulluaqqunngitsoorsimallugit misigisimasut, tamanna angajoqqaarsiaasunut misigissutsitigut sakkortoorujussuuvoq, Albrecht Skifte oqarpoq.
Meeqqat 688-it 2006-ip naalernerani angajoqqaar-sianut inissinneqarsimapput. Sapaatip akunnerata tulliani marlunngornermi novembarip ulluisa 13-anni Inatsisartut ilaatigut eqqartussavaat meerarsiat angajoqqaarsiaminniiginnarsinnaanerannut tunngasoq, angajoqqaaviusut meerartik tigujumagaluarpassulluunniit.
