Meerarsiaminik toqutsimasutut pineqaatissinneqarpoq

Arnaq 22-nik ukiulik meerarsiaminik niviarsiaqqamik ataatsimik ukiulimmik 2008-mi januaarimi toqutsisimasutut ukiuni qulingiluani pineqaatissinneqarsimasut inissiisarfianiittussanngorlugu Nuup Eqqartuussiviani nalunaaqutaq ullup qeqanut eqqartuunneqarpoq. Nuup eqqartuussiviani pineqaatissiineq Nunatta Eqqartuussiavianut ingerlateqqitassanngortinneqarpoq.
Allattoq Bikki P. Kleist
oktobarip 20-at 2009 09:45

Unnerluussut toqutsinermiit toqumik kinguneqartumik nakuusernermut allanngortinneqassasoq pineqaatissiinerullu ukiut tallimat arfineq-pingasullu akornanni sivisussuseqarnissaa arnap illersuisuata piumasarigaluarpaa arnarli toqutsisimasutut ukiuni qulingiluani pineqaatissinneqarsimasunut inissiisarfimmiittussanngortinneqarpoq.

Niviarsiaraq ilisimajunnaaqqasoq Dronning Ingridip Napparsimmavissuanut 2008-mi januaarimi unitsinneqarpoq, ajoquserneqarninilu aqaguani toqqutigalugit.

Timaata misissorneqarneranit nalunaarusiami ilaatigut oqaatigineqarpoq, niviarsiaqqap niaqua ikinnerpaamik natermut pingasoriarluni anaartaanneqarsimasoq.

Arnaq 22-nik ukiulik toqutsisimasutut januaarip arfineq-pingajuanni politiinit tigusarineqarpoq. Arnap tarnimigut marloriarluni misissorneqartussaanera aamma nakorsat eqqartuussinermi siunersiorneqartartut oqaaseqaateqarnissaat pissutigalugit suliaq ukiuni marlungajanni suliarineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq