Meerarpassuit qimarnguinniittarput
Tassami qimarnguinnut saaffiginnittut affangajaat meeqqatik qimarngoqatigisaraat, Siulittaasoq Regine Enoksen oqarpoq.
- Meeqqat annersaaviup iluani peroriartortut eqqarsaatigalugit, angajoqqaat akornanni persuttaasarneq qanoq iliuuseqarlutik meeqqat eqqarsaatigalugit unitsittariaqarpaat, Regine Enoksen oqarpoq.
Qimarnguiit kattuffianni siulittaasoq Regine Enoksen arnanut persuttaasarneq akiorniarlugu Naalagaaffiit peqatigiit ullorititaanni ippassaq sapaammi malunnartinniarneqartumi eqqarsaatigeqqusani pillugu taama oqarpoq. Tassami qimarnguinnik atuisut affangajaat meerartaqarlutik qimarnguimmiittarmata.
- Ajornartorsiutaasorujussuartut taasinnaavarput, soorlu eqqarsarsaatigalugu arnat ukioq manna qimarnguinni nuna tamakkerlugu arfineq marlunni 618-ut atuisut meeraat 268-uupput. Tassa meerarpassuit ukiumut qimarnguimmeeqataasarput timikkut tarnikkullu annersaaneq aallaavigalugu, Regine Enoksen oqarpoq nassuiaallunilu qimarnguinni sulisut meeqqat qimarngoqataaasut isumaginnittoqarfimmut nalunaarutigisaraat, kisianni ilaqutariit tamarmik sullinneqarnissaat anguniarneqartartoq.
- Anguniartarparput meeraq imatut nalunaarutigiinnarnagu ilaqutariittut sullinneqarnissaat, soorunami arnaq aamma akuersiseqqaarlugu, Regine Enoksen oqarpoq.
Qimarnguinnik uteqattaartumik qimarngusartut ikiliartortut Qimarnguiit peqatigiiffiisa kattuffiannit ukiuni kingullerni maluginiarpaat, qimarnguinnulli saaffiginnittartut ukiukilliartorlutik.
