Meeraaqqat nerisassaat navianartunik akullit akikillivaat
Meeraaqqat nerisassaata aserortikkat puuata matui kræfteqalissutaasinnaasunik akullit Danmarkimi pisiniarfinnit peerneqareersut maani Kalaallit Nunaanni akikillillugit tuniniagaapput.
Meeraaqqat nerisassaat Nuummi Pisiffimmi sapaatip akunnerani uani neqeroorutaapput. Pisiniarfiup oqaatiginngisaa tassaavoq nerisassat taakku juulip aallaqqaataaniit nerteqqutaalissammata tuniniaqqusaajunnaarlutillu, puuisa matui akuutissanik navianartunik akoqarneri pissutigalugit.
Meeraaqqat 0-uniit pingasut angullugit ukiullit nerisassaasa puuisa navianartumik bisphenol A-mik akoqarnerat pissutigalugu sananeqartarneri danskit inatsisitigut inerteqqutinngortippaat.
Inatsit nutaaq Namminersornerullutik Oqartussani uumasut nakorsaqarfiannit pisiniarfinnut maajip 21-anni nassiunneqarpoq, bisphenol A-mik akulinnik inerteqquteqalernermik imaqartoq, inatsillu tamanna aamma Kalaallit Nunaanni atuuttuuvoq.
Bisphenol A meeraaqqat imertarfianni aamma miluffianni akutut inerteqqutaalereerpoq, alliartornermut ajoqutaasinnaanera aamma kræfteqalersitsisinnaanera pissutigalugit.
Pisiffiup attaveqaqatigiinnermut pisortaa KNR-imit oqaaseqartinniaraluarparput, taannali pisumut oqaaseqarusunngilaq.
Suliffeqarfik Semper aamma meeraaqqat nerisassaannik sanasarpoq, nerisassat puuinik bisphenol A-mik akulinnik atortoqarluni. Taakku ukioq manna juulip ulluisa aallaqqaataanniit bisphenol A-mik akulinnik atortoqaratik nerisassiortalissapput.
Semperip nerisassiaanik Brugsenimi akikilliliisoqarmat sapaatip akunneri arlalialunnguit qaangiupput, Brugsenip pisiniarfiisa pisortaat, Jes Nyborg, oqarpoq, taamani akikilliliineq massakkut inerteqquteqalernermik tunngaveqanngitsoq. Brugseni meeraaqqat nerisassaannik Nestlémeersunik sapaatip akunnerani uani tuniniaanngilaq.
