Meeqqerivitsialak pillugu Hawaii-liakaassapput
Meeqqerivitsialaap pilersinnissaanut atatillugu Ilinniartitaanermi pisortaqarfiup ataani aqutsisoqatigiit paasisassarsiorlutik Hawaii-mut angalasussanngorput.
Aqutsisoqatigiinni ilaasortaasut ilaat Ilinniartitaanermi pisortaqarfimmi atorfeqartoq Flemming Horsfeldt aperaarput, Meeqqerivitsialaap inerisarnissaa pillugu sooq taama ungasitsigisumut angalasussanngornersut.
- Meeqqerivitsialammut atatillugu suliniuteerarpassuarnik aallartitsisimavugut, Meeqqerivitsialallu Atuarfitsialammut attuumassuteqartussaavoq. Atuarfitsialaallu atuartitseriaaseq Creede-mik taaguutilik ingerlattarpaa. Taanna Inerisaaviup USA-miit isumassarsiarisimavaa sunaaffali Hawaii-miit aallaaveqartuusimasoq, Flemming Horsfeldt nassuiaavoq.
Taannattaaq nassuiaavoq Hawaiip universitetiani atuartitseriaaseq tamanna aallunneqartartorussuusimasoq. Politikikkullu Meeqqerivitsialaap inerisarneqarnissaa pillugu suliakkerneqaramik tulluartuutissimavaat nunamut allamukarlutik paasisassarsiornissartik.
- Meeqqerivitsialaap inerisarnissaanut aqutsisoqatigiiulluta sapinngisamik aallaqqaammut sorpassuit akuliussuuppagut taamaalilluta suliarput siammasinnerusumik paasisaqarfigerusullugu, kisianni tamakkorpassuit ilaat ilanngarterpavut ilisimalikkavullu inatsisiliornissamut atorneqarsinnaasut nalilersorlutigit. Soorlu meeqqeriviit, vuggestuet, ulluuneranilu meeqqanik paarsisartut tamaasa nalilersoqqissaarpavut taamaattumillu Hawaii-mut angalanissatsinni sorpassuit eqqumaffigeqqissaagassaraagut, Flemming Horsfeldt oqarpoq.
Taanna aperaarput Meeqqerivik atuarfillu ataqatigiissinneqarnissaat siunertarineqassappat imaannersoq meeqqat suli meeqqerivimmiillutik atuartinneqarlutik aallartinneqartassanersut.
- Aggustusimi Ilulissani suliaq aallartikkatsigu erseqqissarneqarpoq meeqqeriviit kisimik Atuarfitsialammut naleqqussassanngitsut aamma illuatungaatigut Atuarfiit meeqqerivinnut naleqqussarneqarnissaat uani pineqarpoq, Flemming Horsfeldt taama naggasiivoq.
Meeqqerivitsialaap inerisarnissaanut atatillugu aammattaaq cafe seminarinik taasanik sinerissami sumiiffinni assigiinngitsuni pilersitsisoqarsimavoq, taakku perorsaasunit, angajoqqaanillu peqataaffigineqartarput.
Hawaii-mut angalanissaq februuarimi pissaaq inuillu arfinillit angalanermi peqataassapput taamatuttaaq politikkerit arlallit peqataassapput ilaatigut Ilinniartitaanermi naalakkersuisoq Tommy Marø peqataassalluni.
