Meeqqerivinni akit nalimmassarneqassapput
Kommuneqarfik Sermersuup borgmesterissaata Asii Chemnitz Narupip, Inuit Ataqatigiinneersup akissaatikinnerit illersorneqarnissaat pingaartutut isigaa.
Asii Chemnitz Narup ima oqarpoq:
- Ilaqutariit isertitakinnerusut oqilisaaffigineqarnissaat pingaartipparput, akiliutinillu qaffaannginnissaq Kommuneqarfik Sermersuumi pingaartillutigu. Akunnattunik isertitallit sumiiffinni arlalinni najugallit malunnaatilimmik akiliinikinnerulissapput, aamma akit qaffakkiartornerinut atatillugu iluarsissutissat pinngitsoorneqarsinnaasimanngimmata sumiiffinni arlaqartuni akit qaffaavigineqalaartussaassallutik, Asii Chemnitz Narup oqarpoq.
Sumi najugaqarneq apeqqutaatillugu assigiinngitsunik akeqartitsineq Nuup kommunalbestyrelsiani ilaasortap Kim Godtfredsenip isornartorsiorpaa, assigiiaarnerusumillu akeqartitsinissaq ujartorlugu. Tamanna pillugu Asii Chemnitz Narup ima oqarpoq:
- Ikaarsaariarnermi ataatsimiitiliaq tamarmiusoq isumaqatigeeqqissaarluni akit aalajangerpai, ilumoorporli angajoqqaat illoqarfimmiit illoqarfimmut assigiinngisitaartunik suli akiliisassasut.
Meeqqerivinniititsinermut akit pillugit nalimmassaasoqarnissaa nukingernartoq Asii Chemnitz Narupip oqaatigaa, 2009-lu aallartippat misissuineq aallartissanerarpaa.
