Meeqqerivik oqummit eqqugaavoq
Meeqqat 40-ut sulisullu ininut allanut nuukkallarneqarput Tasiilami Dronning Ingridip Børnehave-ani oqoqartoq paasineqarmat.
Allattoq Noah Mølgaard
Kommuneqarfik Sermersuup maanna misissorpaa Tasiilami Dronning Ingridip Børnehave-ani oquk qanoq annertutiginersoq, Kommuneqarfik Sermersooq nittartakkamini taama paasissutissiivoq.
Meeqqerivimmi oquk peqqinnissamut ulorianaateqartoq paasineqarpoq. Taamaammat kommune aalajangerpoq meeqqat 40-ut sulisullu illoqarfimmi ininut allanut nuunneqarallassasut.
Atuareernermi meeqqat ornittagaat aamma oqoqartoq paasineqarpoq. Taamaattumik aamma meeqqat tassaniittartut illoqarfimmi ininut allanut nuupput.
Kommuunip maanna misissorpaa iluarsaassineq qanoq annertutigisoq aqqusaaqqaarlugu meeqqat sungiusimasaminnut uteqqissinnaassanersut.