Statens Serum Institut Meeqqat qaratsamikkut aseruuttoornerusarput

- Kalaallit qaratsamikkut aseruuttoorneqalersartut Kalaallit Nunaanni Danmarkilu najugaqartuusut misissuinerup takutippaa. Danskit Kalaallit Nunaanni Danmarkimilu najugaqartut nappaammik eqqorneqannginnerusartut misissuinermi aamma paasineqarluni, nakorsaq Anders Koch, ilisimatooq misissuisullu ilaat oqarpoq.

Inuit 448-t, piffissami 1990-miit 2012-ip tungaanut qaratsamikkut aseruuttoorneralersimasut misissuinermi paasineqarpoq. Tassa ukiumut inuit 20-t aseruuttoorneqalertarsimallutik.

Eqqugaasut amerlanerpaat meningitisimik, tassa qaratsap ameraasaatigut aseruuttoornermik, nappaateqalesimallutik.

Meeqqat eqqugaanerpaasartut

Nunatsinni meeqqat ukioqanngitsuniit ataatsimik ukiullit tikillugit nappaammik eqqugaanerpaasartut aamma paasineqarluni. 

 - Tassa meeqqat ukioqanngitsunit marlunnik ukiullit tikillugit timimikkut nappaatinut akiuussutissaat inerivissimaneq ajoramik eqqugaanerusarput, Anders Koch oqarpoq nangillunilu oqarluni, meeqqat utoqqaallu nunarsuaq tamakkerlugu qaratsamikkut aseruuttoornermik eqqugaakkajunnerusartut.

Sooq kalaallit nappaammik eqqugaanerusarnersut ilisimatuut suli oqaatigisinnaanngilaat. Misissuinermili nassuiaatinik marlunnik erseqqissaallutik.

Siullertut tunngavilersuutigaat inooriaatsimut tunngasut, soorlu ineqarnerup aamma inuiaqatigiit aningaasarsiorneranni pissutsit nappaateqalersarnermut apeqqutaasinnaasut. 

 - Assersuutigalugu pujortartartut utoqqaligaangamik nappammik eqqugaanissaminnut qaninnerulersarput. Aammattaaq anersaartornerup aqqutaatigut aseruuttoornerit qaratsakkut aseruuttoornermik kinguneqalersitsisinnaasarlutik, nakorsaq oqarpoq. 

Nappaat kingornuttagaq

Nappaat ilaqutariinni kingornuttagaasinnaasoq ilisimatuut aamma oqaatigaat:

- Inuup timaata qaratsakkut aseruuttoorneq akiorsinnaanngikkaangagu tamanna kingornuttagaalluarsinnaavoq. Tamannali annerusumik ilisimanngikkaluarlugu peqqutaaqataasoraarput.

Sooq kalaallit allanut naleqqiullugit qaratsakkut aseruuttoornerusarnersut oqaatigineqarsinnaanngimmat, tamassuma qanoq nammineerluni pinaaveersaartinneqarsinnaanera oqaatigineqarsinnaanngilaq.

Anders Kochili ataatsimik siunnersuutissaqarpoq.

- Pujortartarneq unitsinneqartariaqarpoq aamma meeqqat eqqaanni pujortartannginnissaq pisariaqarluni.

Qaratsakkut aseruuttoorneq pillugu misissuinerit allat ingerlanneqaleruttortut, Anders Kochip KNR-imut aamma oqarpoq.