Meeqqat ulluanni imigassaq matoqqavoq
Siorna iluatsilluareersoq Tasiilami peqqippoq. Ullumi ulloq tamaat pisiniarfinni imerniartarfinnilu imigassamik nioqquteqarneq matoqqavoq.
- Pisiniarfiit imerniartarfiillu tamaasa inussiarnersumik saaffigisimavagut imigassaq ulloq tamaat matoqqatissinnaaneraat. Saaffiginnissupput ilassilluarneqarsimavoq, Kommuneqarfik Sermersuup Tasiilami immikkoortoqarfiani siunnersortaaneq Kurt Pedersen KNR-mut oqarpoq.
- Taamaasiorpugut malunnartinniarlugu ulloq meeqqat pigigaat tamannalu malugissavaat inersimasut aalakoortut akornanniinnatik, Kurt Pedersen oqarpoq.
Tasiilami tamassa seqinnarissuuvoq. Meeqqerivimmiut illoqarfimmi ingerlaarsimapput ilaatigut erinarsortarlutik.
Meeqqat ulluannik malunnartitsiniaaneq timersortarfimmi ualimut ingerlaqqissaaq ilaatigut atisanik takutitsisoqassalluni atisallu takutinneqartut akikillillugit KNIp tuniniarniarpai.
Illoqarfimmi imerniartarfiit nivinngaallutik nalunaarsimapput imigassamik nioqquteqarneq aatsaat nalunaaqutaq 00.01 ammaqqissasoq.
- Siorna aamma meeqqat ulluanni imigassamik nioqquteqarneq ulloq tamaat matoqqavoq assullu tamanna iluatsilluarpoq, Kurt Pedersen oqarpoq.
