Meeqqat uippakajaartut amerliartuinnarput

Nunani avannarlerni meeqqat quliugaangata ataaseq stressernerup, tassalu uippakajaarnerup ilisarnaatigisartagaanik atugaqartartoq, aviisimi Politikenimi allaaserineqarpoq. Meeqqat, anniarneq uippakajaarnerlu pillugit nunarsuarmi ilisimatusartut nuimanersaasa ilaat Stockholmimi napparsimmavimmi Karolinska Universitetssjukhuset-mi meeqqat nakorsaat Gösta Alfvén taama isumaqarpoq.

Danmarkimi Hillerød Sygehusimi sapaatip-akunnerani ataatsimi meeraq ataaseq marlulluunnit uippakajaarnerup ilisarnaatigisartagaanik atugaqarlutik unitsinneqartarput, ukiut tallimat ingerlanerinnaani qaffariaat 30 procentiulluni. Aalborgimi meeqqat unitsinneqartartut aamma taama amerlatigipput, Danmarkimilu meeqqat akornanni uippakajaarneq ajornartorsiutaaleraluttuinnartutut isigineqarpoq.

Roskildemi meeqqat nakorsiartartut unitsinneqartartullu 10 procentii uippakajaarnermik pissuteqarput. Ilisarnaatit tassaasinnaapput, niaqqukkut, naakkut avatikkullu anniaateqarneq, ilisimajunnaartarneq, isigisat allanngortarnerat kiisalu aalajangersimasumik samminnissinnaannginneq.

Angajoqqaat uippakajaarnerat meeqqat taamaalisarnerannut peqqutaasoq, tarnip pissusaannik ilisimasallit arlallit maluginiarsimavaat. Meeqqat uippakajaarnermik atugallit ilikkarnissaraluannut unitsitsisarpoq, inersimasunngorunik atukkatik allaat nassarsinnaallugit.