Meeqqat tusilartuunersut misissorneqartalissapput

Nunarput tamakkerlugu siunissami inoorlaat periuseq nutaaq atorlugu tusaasinnaassutsiminnik misissorneqartarnissaat neqeroorutigineqartalissasoq Peqqissutsimut Pisortaqarfik nalunaarpoq.

Periuseq nutaaq navianaateqanngilaq, siutit akornusersinnaanerannut ulorianaateqarani – ippinnartoqanngilaq misissortinnerlu sekuntialunnguanik taamaallaat sivisussuseqarpoq. Misissuineq najukkani napparsimmavinni ernisunik paaqqinnittuusunit ingerlanneqarsinnaassaaq.

Tusaasinnaassutsimik misissuinissamik nutaamik neqerooruteqarnikkut tusaasinnaassutsikkut akornutaasinnaasut imaluunniit tusilartuunerup piaartumik paasineqarsinnaanissaat siunertarineqarpoq, taamaalilluni katsorsarneqarneq piaartumik aallartinneqarsinnaaniassammat.

Ukiut tamaasa imaluunniit ukioq ataaseq allortarlugu Nunatsinni meeraq ataaseq tusilavissuulluni inunngortarpoq, taakkualu piaartumik paasineqarnissaat pingaartuuvoq, taamaalillutik tusartaatilerneqarniassammata imaluunniit annikitsumik pilanneqarsinnaaniassammata.

Tusilavissunut aammattaaq elektrodinik siutip iluanut ikkussisoqarsinnaavoq – taamatut suliaritinneq Danmarkimi ingerlanneqartarpoq sapinngisamillu meeraq marlunnik ukioqalertinnagu pissalluni.