Utoqqatserpugut. Meeqqat ikinnerpaamik arfineq-marluk koraanimik atuarfimmi tuartut timmisartukkut saassussisoqarmat toqutaammata, Afghanistanimi sakkutuut nunanit tamaneersut taama nalunaarput.
- Sussuseqanngitsut saassussinermi tassani toqutaammata ajuusaarutigeqaarput, iligiit sakkutuuisa oqaaseqartartuat, Chris Belcher, oqarpoq.
Saassissineq ippassaq pivoq, Al Qaeda-kkut najugaqarfigigunagaannut saassussinerugunarluni, tassanilu naalaffeqarlunilu koranisut ilinniarfimmik atuarfeqarpoq.
- Qaartartumeeriffiusoq ulloq naallugu alaatsinaapparput, meeqqanillu atuarfimmiittoqarnera maluginngilarput, Chris Belcher nassuiaavoq.
Iligiit nassuiaapput, meeqqat saassussinermi ajoqusinngitsut oqaluttuarsimasut, pikitsisitsisut meeqqat pinngitsaalillugit anisinnaveersaarsimagaat.
Inunnik sakkutuujunngitsunik toqutaasoqarnera præsident Hamid Karzai-imut ilungersunaqaaq. Afghanistanimi naalakkersuisut naapertorlugit inuinnaat 120-nit amerlanerit qaammatini kingullerni toqunerannut sakkutuut nunani allaninngaaneersut pisuupput, taamaammallu afghanistanimiorpassuit akerliussutsimik takutitsisarput, piumasaraallu præsidenti tunuassasoq, sakkutuullu nunani tamalaaneersut Afghanistan qimassagaat.