Meeqqat timersornermik soqutigisaqaannarnissaanik suliniuteqarneq
Inuusuttut timersornermik soqutigisaqaannarnissaannut sutigut iliuuseqartoqasinnaanera sammineqarpoq, oqallinnermilu inuit 60-it peqataapput, sungiusaasut, namminneq kajumissutsiminnik suliaqartut kiisalu pisortaneersut peqataallutik.
Kultureqarnermut Ilinniartitaanermullu Naalakkersuisoq, Nick Nielsen aamma AWG 2016-imi General Manageri Maliina Abelsen aamma peqataapput.
Nunatsinni Timersoqatigiiffiit Kattuffiat nittartakkamini taama allappoq.
Inuusuttut timersornermik soqutigisaaruttarnerat nunarsuaq tamakkerlugu ajornartorsiutaavoq, tamatumalu aaqqiissuteqarfiginissaa isumasioqatigiissitsinermi siunertarineqarpoq.
Timersornerup iluani naleqartitat siuarsarnissaannut kivitseqatigiinnissamut isumassarsiorsiortitsiniarluni taamatullu aamma meeqqat inuusuttullu ineriatortitsivigineqarnissaat peqqinnartunillu soqutigisaqalernissinnissaat anguniarlugu isumaqasioqatigiinnermi saqqummiisoqarpoq, isummersoqatigiittoqarluni workshoppertoqarlunilu.
Isumasioqatigiinnermilu saqqummiisut ilagaat savalimmiormiu Magni Mohr, ilaatigut nunani Issittuni sungiusarnemut tunngasunik immikkut ilisimasalik. Magni Mohr arsaattartut klubbiani Chelseami sulinerminik annertuumik misilittagaqartuuvoq.
Magni Mohr Elite Sport Greenlandimit Nuummut tikeraartinneqartoq Nuummiunut aamma oqalugiartussaavoq. Nunani issittuni sungiusarnermi timinut sunniutaasartut ilaagut oqalugiaatigissallugit.
