Meeqqat timaat toqungasut nassaaraat

Niviarsiarannguit marluk, aappaa arfineq-marlunnik aappaalu qulinik ukiulik, Belgiami illoqarfimmi Liegemi, juunip ulluisa qulingiluaanni, illoqarfimmi tassani nalliuttorsiortoqarnerani unnuakkulli periarfeerunneqartut, timaat toqungasut Belgiami politiit nassaarigaat, misissuinermi eqqartuussisoq akisussaasuusoq nalunaarpoq.

Arfineq-marlunnik ukiullip, Stacy Lemmensip, timaa, affarmik qatanngutigiinnguit taakku taamani periarfeeruffiisa ungasinngisaani, tassa qimuttuitsut unittarfiata eqqaani, nassaarineqarpoq. Qulinik ukiullip, Nathalie Mahyp, timaa ungasinngisaani aamma nassaarineqarluni.

Misissuinermi eqqartuussisoq isumaqarpoq, niviarsiaqqat qanittukkut aatsaat toqunneqarsimanngitsut.

Niviarsiaqaat pineqartut periarfeerunneqarnerat Belgiami innuttaasut assorsuaq ernumatissimavaat, meeqqanimmi 1990-ikkunni ikkatilliisarnertut amiilaarnaqisutut ittumik pisoqarsimanissaa ersissutigineqaraluarmat.

Meeqqanik ikkatilliisimasut Marc Dutroux nulialu meeqqanik ukiukitsunnguanik katillugit arfinilinnik ikkatilliisimasut taamani tigusarineqarput. Illoqarfimmiillu Liegemit niviarsiarannguit marluk taamani aamma aallarussaapput, ikkatilliisimasullu naatsiivianni iliverneqarsimasut kingorna nassaarineqarput.

Belgiami politiit arriippallaartumik taamani qisuariarsimanerarneqarput sullarlunnerarneqarlutillu. Maannali pisumi politeerpassuit aallaqqaammulli sukumiisumik ujaasisimapput.