Meeqqat sumiginnakkat angerlarsimaffittaarput

Suliniut nutaaq, Ilasiamik taaguuserneqartoq, meeqqanut inuusuttunullu pingasuniit 17-inut ukiulinnut, inuttut ajornartorsiuteqarnertik pissutigalugu angerlarsimaffimminni najugaqarsinnaanngitsunut inissatut neqeroorutaavoq.

Ilasiaq Nuussuarmi illumi angisuumi pilersinneqartoq, meeqqanik sumiginnagaanerup, innarligaasimanerup allanillu kingunerlutsitsinerup kingunerisaanik misigissutsikkut, ineriartornikkut inuttullu atugarisatigut ajornartorsiortunut inissiaavoq.

Ataatsimut isigalugu suliniut inuttut atugarisanik ajortunik tarnikkullu kingornussanik ajortunik qimatsinissamut tapersiissaaq, sumiginnagaasarnerullu kingornuteqqinnissaa pinaveersimatillugu. Meeqqat Inuusuttullu Illuannit imminut ingerlatittunit, Mælkebøttenimit, tusagassiuutinut nalunaarummi tamanna erserpoq.

Inissiaq nutaaq ilaqutariinni børnehjemminilu inissiisarnernut tapertatut isigineqassaaq.

Ilasiaq Namminersorlutik Oqartussanit akuerineqarpoq, meeqqat inuusuttullu inissinneqartut pillugit suleqatigiinnissamik Kommuneqarfik Sermersuumut aamma isumaqatigiissusiortoqarluni.

Inissiaq nutaaq Danmarkimi aningaasaateqarfinnit Velux Fondenimit 4,8 millionit koruuninik taperneqarpoq, Danmarkimi atugarissaarneq pillugu ilisimatusarfimmit nalilersorneqarumaarluni.