Meeqqat sukkortut amerliartorput

- Napparsimmavimmut insulinimik aalleraangatta peqqissaasoq qummut ilagisariaqartarpara køleskabimi tikkuunniarlugu suna atorniarnerlugu. Sukkortumut 14-inik ukiulimmut aanaajusoq Karen Kristiansen Upernavimmit Dronning Ingridip Napparsimmaviani meeqqat sukkortut ataatsimoortinneqarnerannut peqataasoq taama oqarpoq, nangillunilu:

- Napparsimmavimmi sulisut meeqqat sukkortut suut atortarneraat ilisimasariaqaraluarpaat.

Taama oqarpoq Karen Kristiansen, taassuma erngutaa meeqqani kalaallinik angajoqqaalinni sukkortuni Kalaallit Nunaanni siullersaavoq.

Sukkorneq kalaallit meerartaanni ima atugaanngitsigaaq 18-it inorlugit ukiullit maanna arfiniliinnaallutik.

Margrethe Andersen Upernavimmeersoq aqqanilinnik ukiulimmik sukkortumik erneqartoq, napparsimmaveqarfimmi meeqqanut sukkortunut kapuutissat nunguttarneri iluarinartinngilaa, meeqqanut kapuutissat nungukkaangata inersimasunut naleqqussakkanik atuisariaqartarnerarput.

Soorunami kapuut angivallaaq annerisaramiuk nuannarineq ajorpaa, taamaaligaangat piaartumik meeqqanut naleqqussakkanik napparsimmavimmut qinoqqusisarpunga, Margrethe Andersen oqarpoq, sukkortumut Thomas Andersenimut anaanaasoq.

Adam Tobiassen arfineq-marlunnik ukiulimmik ernilik meeqqani sukkornermik nappaatilik qanoq malugisimaneraa aperigatsigu ima oqarpoq.

Ernerput imertorujussuuvoq, quikulaarpoq, qasujavoq sanigorlunilu.

Adam Tobiassen, Malimmut ataataasoq Saqqaminngaanniit pikkorissarnermut peqataasoq taama nassuiaavoq.

Peqqissaasoq Hanne Egede ukiut pingasut angajoqqaanik meeqqanillu atuartitseqataasartoq qanoq ingerlaaseqartarnerminnik oqaluttuarpoq.

- Ilisimasallit assigiinngitsut ilinniartitsisuusarput, meeqqat nakorsaat nerisanillu ilisimasallit nassuiaatinneqartarput.

Sukkorneq Diabetes 1 – inuunerup sinnerani nappaataalersartoq insulinimik kaportarialiuvoq.

Kaportarialimmik sukkortut ilaqutaalu sapinngisamik ukiut tamaasa naapeqatigiittarput, uanilu sapaatip-akunnerani Nuummiipput.