Meeqqat siunnersuisoqatigiivi pilersinneqarput

Kalaallit Nunaanni Meeqqat pillugit Siunnersuisoqatigiit pilersinneqarput. Inuit siunnersuisoqatigiinnut ilaasortaanissamut piukkunneqartut 22-it akornanni siulittaasoq ilanngukkaanni inuit arfineq marluk ilaasortassatut toqqarneqarput. Meeqqat pillugit Siunnersuisoqatigiit 2012-imiit 2015-imut atassapput.

- Meeqqat Siunnersuisooqatigiivini ilaasortat ataatsimoorlutik ilaatigut meeqqat peroriartornerannut inerikkiartornerannullu, meeqqat atuarfimmiinnerannut, meeqqat kulturikkut sunngiffimmilu sammisaqarnerannut, meeqqat peqqissusaannut, meeqqat inatsisitigut inissisimanerannut meeqqallu immikkut pisariaqartitaannut ilisimasaqarluartuupput, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik taama ilisimatitsivoq.

Inatsisartut inatsisitigut 2011-mi naqissuserpaat Kalaallit Nunaanni Meeqqat pillugit Siunnersuisoqatigiinnik pilersitsisoqassasoq.

Meeqqat pillugit Siunnersuisoqatigiit:
Inuk Bourup Bang, tarnip pissusaanik ilisimasalik, Nuuk.
Alma Tønnesen, Aasianni meeqqanut inuusuttunullu sunngiffimmi sammisassaqartitsinermik sisorarnermillu sammisaqartoq.
Johan Reimer, ilinniartitsisoq, Nuussuup Atuarfia.
William Kriegel, ineriartortitsinermut pisortaq, Kommuneqarfik Sermersooq.
Morten Nornild, inatsisileritooq, Biskopeqarfik.
Jâraq Olsen, peqqinnissamik isumaginnittoq, Nuuk.