Meeqqat pisinnaatitaaffii pillugit ICC upernaaru ataatsimiisitsiniarpoq

Kalaallit meerartaasa kaannerannik oqallinnermi paasissutissat eqqunngitsut tunngavigineqarmata, Inuit Issittormiut Siunnersuisoqatigiiffiat, Nunatsinni meeqqat, meeqqallu pisinnaatitaaffii pillugit ataatsimiititsinermik aaqqissuussiniarpoq.
Allattoq Lotte Holm
februaarip 02-at 2009 07:15

ICC-ip Nunatsinni siulittaasua, Aqqaluk Lynge, Radioaviisimut taama erseqqissaavoq.

- Ajornartorsiut peqqissaartumik nassuiarneqartariaqarpoq, taamaammat upernaaru ataatsimiititsiniarpugut, Alaskamit Canadamilu issittumi najugallit paasisimasaqarluartut ilaatigut peqataatillugit, ajornartorsiutit ataatsimut qulaajarniassagatsigik, Aqqaluk Lynge oqarpoq.

UNICEF-ip sapaatip akunnerata siuliani Kalaallit Nunaata Naalagaaffiit Peqatigiit meeqqat pillugit isumaqatigiissutaanik malinninnginnerarlugu oqaatigimmaguli oqallinneq aallarteqqippoq.

Aqqaluk Lynge isumaqarpoq, UNICEF-ip paasissutissiissutai eqqunngitsut, oqarporli ajornartorsiut allarluinnarmiittoq, tassalu ilaqutariinni akissaatikitsuni.

Upernaaru ataatsimiititsinissap saniatigut ICC aamma aalajangerpoq, Inuit Issittormiut Siunnersuisoqatigiiffiata 2010-mi ataatsimeersuarnissaani ”Inuit atugarissaarnerat” qulequtaritinneqassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq