"Meeqqat pisinnaatitaaffii imaanngittoq meeqqat pissaaneqarnerat"
Kalaallit meerartaasa, assersuutigalugu danskit meerartaannut naleqqiullugit, meeqqatut immikkut ittunik pisinnaatitaaffeqarnertik ilisimasaqarfiginerugaat Naalagaaffiit Peqatigiit Nunarput pillugu misissuineranni nutaami tamanna erserpoq.
Gallup Danmarkimi Inuttut pisinnaatitaaffiit pillugit misissuisoqarfik aamma Naalagaaffiit Peqatigiit Meeqqat pillugit aningaasaateqarfiat, Unicef, sinnerlugit Nunatsinni Danmarkimilu meeqqat atuartut 12-it 16-illu ukiullit akornanni apersuilluni misissuisimavoq. Nunatsinni meeqqat 38 procentiisa meeqqat pisinnaatitaaffii pillugit ilisimasaqarfigalugit imaluunniit ilisimasaqarfigilluarlugit akissuteqarput. Ukiut tallimat matuma siorna 24 procentiinnaat taama akissuteqarput.
Meeqqat pisinnaatitaaffii pillugit sulissivimmi MIO-mi oqaaseqartartup Aaja Chemnitz Larsenip tamanna nuannaarutigaa.
- Isumaqarpunga meeqqat inuusuttullu pisinnaatitaaffimminnik ilisimaqarnerannut Nakuusap suliniutaa pissutaalluinnartoq. Matumanimi uagut naalakkersuisutiguunngitsumillu suliniaqatigiiffiit allat annertuumik suliaqarpugut.
Aaja Chemnitz Larsenip Gallup apersuilluni misissuinerata pitsaasumik ineriartortoqarneranik takutitsinera nuannaarutigaa. Pisinnaatitaaffiilli sukumiinerusumik apeqqutigineqarnerini allatut inissisimasoqarpoq. Kalaallimmi atuartut tassunga atatillugu ilisimasakinnerupput.
- Pisinnaatitaaffiit pillugit apeqqutigineqartut ilaat misissuataaraanni, meeqqat taakku pisinnaatitaaffik soorpiarnersoq tamatigut ilisimasanngikkaat takuneqarsinnaavoq, Aaja Chemnitz Larsen oqarpoq.
Pisinnaatitaaffiit pisortatigoortut ilisimaqarfigineri aammalu meeqqat nammineq inuunerminnut tunngasuunerinik ilisimasaqarnerat assigiinngissuteqarput, Chemnitz Larsen nassuiaavoq.
Aammattaaq pisinnaatitaaffiit soorpiarneri paatsungassutigineqarsimavoq.
- Soorlu assersuutigalugu meeqqat ilaat oqarsinnaapput 'uagut pisinnaatitaaffeqaratta erruinianngilagut'. Tamannali paatsoornermik tunngaveqarpoq. Akuutitsiniarnermimi tusaarneqarnissaq pineqarpoq, sumut naalagaanissaq pineqarani. Aamma uagut inersimasut meeqqat tusaarniarnissaat tamatigut pikkoriffigineq-ajorparput, Meeqqat illersuisuat, Aaja Chemnitz Larsen, Meeqqat pisinnaatitaaffii pillugit sullissivimmi Mio-meersoq taama oqarpoq.
Naalagaaffiit Peqatigiit isumaqatigiissut Meeqqat pisinnaatitaaffii pillugit isumaqatigiissummik akuersissuteqarnerinit ukioq manna ukiut 25-t qaangiupput. Danmarkip isumaqatigiissut 1991-imi atsiorpaa, Nunatsinnilu 1993-imi atuutilersinneqarluni. Danmarkip Nunattalu meeqqat pisinnaatitaaffiisa qularnaarnissaat pisussaaffigaat - soorlu assersuutigalugit atuarsinnaatitaaneq, sunngiffeqarsinnaatitaaneq aamma tusaaneqarsinnaatitaaneq.
