Meeqqat pillugit UNICEF suleqatigiinnissamik isumaqatigiissuteqarfigineqarpoq
Kalaallit Nunaanni meeqqat peroriartornissaminnut ineriartornissaminnullu periarfissaat pitsaanerpaatut eqqarsaatigineqarsinnaasut periarfissinniarlugit, Naalagaaffiit Peqatigiit meeqqat pisinnaatitaaffii pillugit isumaqatigiissutaannik tunngaveqartumik aammalu Kalaallit Nunaata kulturia Nammersorlunilu inissisimanera ataqqillugu.
Kalaallit meerartaasa atugaat aatsaat iluamik paasineqalerput ukiut aappassaata affaa qaangiuttoq misissuisoqarmat kalaallit meerartaasa akornanni isumaginnilluannginneq annertuujusoq paasineqarmalli.
UNICEF-ip aallartitai tassaapput UNICEF-imut illersuisoq grevinde Alexandra Frederiksborgimeersoq, siulersuisuni siulittaasoq Alfred Josefsen generalsekretærilu Sten Andersen.
Grevinde Alexandrap kingullermik prinsesseulluni maaniittup Kalaallit Nunaat takoqqikkamiuk nuannaarpoq. - Siullerpaamik 1997-imi maaniippunga angalanermillu tupinnaannartumit eqqaamasaqaqalunga uteqqinnissaralu assorsuaq qilanaarisimallugu, seqinnarinneranilu takoqqillugu kusanaqaaq. Namminersorlutik Oqartussat UNICEF-illu akornanni suleqatigiinnissamik isumaqatigiissut annertooq suliarisimavarsi, taanna sumut tunnganersoq aperineqarami Alexandra ima akivoq:- Taanna pingaaruteqarluinnartumik pilersitsinissamut aammalu suleqatigiiffigisassatsinnut ingerlateqqitassamut tunngavoq, tamatumanilu maaniilluta Namminersorlutillu Oqartussat peqatigalugit meeqqat inuusuttullu pitsaanerusumik inuuneqalernissaannut ikiorniarlugit, tamanna oqaluttuarisaanermut tunngavoq, pissutigalugu aqutsisoqatigiinnit maaniittunit aqutsisulerlugu pilersinneqassammat suliassat suliarineqarniassammata nakkutigineqarlutillu, UNICEF Danmarkip illersuisua grevinde Alexandra oqarpoq.
Meeqqat atugaasa pitsaanerulersinnissaannik suliassaq ilorraap tungaanut iluarsiniarlugu, ilaqutariinnermut naalakkersuisoq Maliina Abelsen oqarpoq.
- Tassami tamanna ima kinguneqarpoq nunani tamalaani suleqatissarput pissarsiarigatsigu suleqatigalugu aallartissinnaasarput maanilu Kalaallit Nunaanni meeqqat atugaannik pitsaanerulersitsisussaq, taamaattumillu ajunngivilluni, Maliina Abelsen oqarpoq.
Tamanna suliap eqaannerulerneranik kinguneqassanersoq Maliina Abelsen aperineqarami ima akivoq:
- Taamatut oqarsinnaavutit, oqarsinnaagattami sammisassatsinnut sisamaasunut suliassatut pilersaarummik taaneqartartoq suliarilissagatsigu, inuiaqatigiinni isummanik tunngaveqartumik inatsisivullu qimerloorluarlugit nalilersuillutalu, tamannalu assorsuaq qilanaaraarput suleqatigiinnissatsinnullu pilersaarusiorfigalugu, Maliina Abelsen naggasiivoq.
Suleqatigiinnissamik isumaqatigiissut Hans Egedep Illuani immikkut malunnartitsinermi tamanut saqqummiunneqarpoq.
