Meeqqat pillugit Namminersornerullutik Oqartussat nalunaarusiaat isornartorsiorneqarpoq
Meeqqat inuusuttuaqqallu inuttut ajornartorsiutaat nalunaarusiami allaaserineqarsimanngillat, Dora Drechsel peqatigiiffik Meeqqat Inuunerissuneersoq oqarpoq nangillunilu:
- Misissuinerit assigiinngitsut piviusut tamakkiisumik ilaatinngilaat. Soorlu massakkut ullumikkorpiaq pissutsit soorlu meeqqat perlilersut meeqqat piitsuunerisalu kisitsisitigut assigiinngitsut ilaatinneqanngillat. Tamannalu eqqumiiginarsinnaavoq taamaattoqannginnera, kisianni uagut nalilersinnaanngilarput sooq ilaatinneqarsimannginnersut, oqarpoq Dora Drechsel.
Meeqqat inuusuttuaqqallu inuttut ajornartorsiutaat nalunaarusiami allaaserineqarsimannginnerat peqatigiiffiit Meeqqat Inuunerissut kiisalu Red Barnet-imit isumaqarfigineqarput.
FN-p meeqqat atugarisaat pillugit ataatsimiitsitaliami atsioqatigiissimasut peqatigalugit, ukiut sisamakkaarlugit meeqqat inuusuttuaqqallu atugarisaat pillugit pisortatigoortumik FN-imut nalunaarusiortartussaapput. Ilaqutariinnermut peqqissutsimullu pisortaqarfiup nalunaarsiaq kingulleq suliaraa. Red Barnet kiisalu Meeqqat inuunerissut isumaqarput nalunaarusiaq eqqunngitsuusoq, naak Ilaqutariinnermut peqqissutsimullu pisortaqarfiup nammineq misissuinerit ingerlassimasaat ajornartorsiutinik arlalinnik ersersitsigaluartut.
Peqatigiiffiup Meeqqat inuunerissumit ersarissaatigineqarpoq MIPI’p Arktisk Forsknings Journalillu erserseriigai ilaatinneqanngitsut Red Barnet peqatigalugu nalunaarusiamut ilanngunniarlugit.
