Meeqqat ornittagaannut qanilleqqusaanavianngilaq
Akilinermi meeqqanik atornerluisartut, nunatsinniit allaanerujussuarmik pineqartarput.
Akitsinni Cambridge Bay-imi meeqqanik atornerluisarsimasoq, angut 26-inik ukiulik, meeqqanik ukiukitsunik marlunnik atornerluisimanermini, ukiuni arfineq-pingasuni pineqaatissinneqareerluni, pineqaatissiissutini naammassillugu, paarnaarussivimmiit animmat, Iqalunnut aallartinneqarpoq, CBC North taama allappoq.
Angutip taassuma pineqaatissinneqarnini naammassereeraluaraa, Iqalunnut tikimmat, ingerlaannaq politiinit tigusareqqinneqarpoq.
Politiit tigusarinninnerminnut patsisigaat, angut taanna avatangiisiminut suli navianartuummat.
Eqqartuussivimmi sassartinneqareerluni, angut 26-inik ukiulik, eqqartuussivimmiit piumasaqaatitalimmik aniseqqinneqarpoq. Angut taanna, meeqqat ornittagaanut, soorlu atuakkanik atorniartarfinnut, atuarfinnut, naluttarfinnullu qanillattoqqusaanavianngilaq.
Angutip pineqartup eqqunngitsumik politiinit pineqarsimanera illersuisuata saqqummiukkaluarpaa, eqqartuussisulli politiit ajunngitsumik iliorsimasutut nalilerpai.
