Meeqqat napparsimallutik uninngasut immikkoortortaqanngillat

Kalaallit Nunaanni napparsimmaveqarfimmi meeqqanut napparsimasunut atugassaritinneqartut europamiut nalilersuutigisartagaat naapertorlugit ajorluinnarput. Nuummi Dronning Ingridip napparsimmavissuani meeqqanut napparsimallutik uninngasunut immikkoortortaqanngilaq, uninngasoqarpallaanngikkaangalli inersimasunut immikkoortortap qinnguani meerarpaluttumi inissineqarsinnaasarlutik. SANA-mi meeqqanut nakorsaq, Britta Olsen oqarpoq, Naalagaaffiit Peqatigiinni meeqqat pillugit isumaqatigiissutigineqarsimasut Kalaallit Nunaanni napparsimmavinni unioqqutinneqartut. SANA-mi meeqqanut uninngasunut inigitinneqartartumi meeqqanut sygeplejerski, Maja Chemnitz ilagalugu ullumi alakkarpavut.
februaarip 14-at 2008 17:13

-Meeqqanut uninngasunut immikkoortortaqanngilavut, immikkoortortap M-ip qinnguani meeqqat arfineq pingasut uninngasinnaapput, meeqqalli amerlanerusut uninngagaangata inersimasut akornannut inissinneqartariaqartarput, meeqqallu ikinnerit uninngagaangata inersimasut napparsimasut meeqqanut inigitinneqartartunut inissinneqartarput. Soorunami meeqqanut napparsimasunut angajoqqaavinullu atugassarititaasut pitsaanerujussuusinnaagaluarput, soorlu meeqqat silami aneerfigisinnaasaminnik pinguartarfeqanngillat, uninngatillutillu illup iluani arpaqattaarsinnaangillat, inersimasut peruluttut immikkoortortaanniikkamik. Ineerannguaqarpoq meeqqat pinguarfigisinnaasaannik iluamilli pinngussersornissaanut inissaqanngilaq, meeqqerisumillu sulisoqannginnatta katsorsartinnerup saniatigut meeqqat pisariaqartitaat isumagisinnaanngilavut, meeqqanut sygeplejerski Maja Chemnitz oqaluttuarpoq.

Naalagaaffiit Peqatigiit meeqqat pillugit isumaqatigiissusiaanni malittarisassat malinneqarnersut apeqqutigigatsigu, meeqqat nakorsaat, Britta Olesen, oqarpoq;

Naalagaaffiit Peqatigiit meeqqat pillugit isumaqatigiissusiaanni malittarisassat malinneqarnersut apeqqutigigatsigu, meeqqat nakorsaat, Britta Olesen oqarpoq;

-Isumaqatigiissusiami malittarisassat naapertorlugit meeqqat napparsimavimmi uninngasut sulisunit meeqqat timikkut tarnikkullu pisariaqartitaannik suliaqassallutik ilinniagaqarsimasunit isumagineqartussaapput, malittarisassallu taakku malinneqanngillat.

Isumaqatigiissusiami malittareqqusat unioqqutinneqarnersut apeqqutigigatsigu, meeqqat nakorsaat akivoq;

-Naalagaaffiit Peqatigiit isumaqatigiissusiaanni malittareqqusat qiviarutsigit taava oqartariaqarpunga taakku unioqqutippavut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq