Kalaallit meerartaasa tamarmik pingajorarterutaat ajornartorsiutinik sorsugassaqarput. Tamanna siorna ilisimatusarnikkut misissuinerup inernerata takutippaa.
Meeqqat pitsanerusumik inuulernissaannut suut iluaqutaasinnaanersut misissuinermi nutaami akissutissarsiniarneqalerpoq. Misissuinermut pilersaarusiortunut ilaavoq Danmarkimi inuit inooqatigiinnerannik misissuisarfimmi ilisimatusartoq Else Christensen.
- Meeqqat inuuniarnermikkut ajornartorsiortut amerlanerusutigut angajoqqaaqartarput ajornartorsiuteqartunik, tassalu angajoqqaaminnik assut imerajuttunik, meeqqallu taakkua pitsaanerusumik inuuneqalernissaannut ikiugassaasarlutik.
Ilisimatusarnikkut misissuineq meeqqat inuusuttullu angerlarsimaffiata Nuummiittup Mælkebøttenip Danmarkimilu inuit inooqatigiinnerannik misissuisarfiup suleqatigiiffigaat.
Ilisimatusartunit meeqqat 60-it 2010-mi, 2011-mi 2012-imilu nuuttut malittarineqassapput. Meeqqat inuunermikkut eqqarsartaatsimikkullu atugaat sullissiveqarfimmi najugaqarneranni kiisalu nuunnerminniit ukiut arfineq-marluk qaangiunneranni malittarineqassapput. Ilisimatusartut taamaaliornermikkut neriuutigaat meeqqat sumiginnagaasimasut piaartumik ikiorsiivigineqartarnissaanni periaatsit nutaat nassaarissallugit.