Meeqqat Myanmarimeersut ikiorneqarnissaat ujartorpaat
Myanmarimi, tassa siornatigut Burmamik taaneqartartumi, meeqqat 700.000-it ikiorneqartariaqarnissaat, Meeqqat pillugit Naalagaaffiit Peqatigiit suliniaqatigiiffat Unicef nalunaaruteqarpoq.
Allattoq Mads Lynge
juulip 25-at 2008 11:38
Maajip qaammataani Myanmarimi anorersuallarmat inuit 138.000-it ajunaanngikkunik maqaasineqartutut nalunaarutigineqarput.
Inuit 2 millioninit amerlanerusut maanna ikiorneqarnissaminnik utaqqipput.
- Naak pissutsit taamanikkunniilli pitsanngoriartuaaraluartut, meeqqallu napparsimalerssimanngikkaluartut, ikiuisinnaanissamik piareersimasariaqarpugut, suliniaqatigiiffiup Unicefip Myanmarimi aallartitaa Ramesh Shestra oqarpoq.
Nunat Asiap kujammut kangisissortaaniittut suleqatigiiffiat ASEAN ikiuiniarnermut aningaasartuutissat 4,7 milliardi koruuniunissaat ilimagaat.
