Meeqqat misiliutigineqartut pillugit filmiliortoqarpoq
Oqaluttuami meeqqat 22-t pineqarput, taakku 1950-ikkunni toqqarneqarput Danmarkimullu nassiunneqarlutik, tassani "perorsarneqaqqissagamik". Uanga oqaluttuamut annertuumik aamma ilaatilluinnarpara meeqqat Danmarkimut aallartitaanerisa kingunerisaanik oqaatsitik annaammatsigik. Annaasaqarnerisalu kingunerisaannik meeqqat taakku, maanna utoqqaliarsaaleraluartut, inuunerminni sakkortuunik misigisaqarlutik assoroortarput, uterusullutik, kinaassusertik paaserusukkaluarlugu, kalaaliuppat imaluunniit qallunaajuppat? Filmimut ilitsersuisup, Louise Friedbergip, oqaluttuaq filmiliarileruttukkani pillugu naatsumik taama nassuiaavoq. Filmiliaq immiunneqartoq pisuusaartitaavoq, oqaluttuassartaali piviusumik aallaaveqarpoq. Oqaluttuami meeqqat 22-t pineqartut 1951-imi immikkut toqqarneqarput Kalaallit Nunaanni siuttussatut piukkunneqarlutik. Meeqqat iluamik nassuiaanneqanngitsut, angajoqqaallu akuersissutaannik qinnuigineqanngitsut, arsaarinnissutigineqarput, siullermillu Danmarkimut nassiunneqarlutik. Tassani qallunaatut ilinniartinneqarput, Kalaallit Nunaanni qallunaatut ilinniartitsinermut atatillugu takussutissiassatut maligassiuisussatullu inissinneqassammata. Kingusinnerusukkut meeqqat ilaat Danmarkimiitillutik meerarsianngortinneqarput, sinneri Nuummut uterlutik, meeraanermillu sinnerani meeqqat angerlarsimaffianni inissinneqarlutik. Tassani Louise Friedbergip filmimik immiussinera aallartippoq, oqaluttuarlu filmiliarissallugu tunngavissaqartoq, Louise Friedberg isumaqarpoq.
-Tamakkiisumik isiginnissagaanni oqaluttuaq nalinginnaasuuvoq, namminerisarsiorani anguniakkap ajalusoorneranik oqaluttuaq. Silarsuit marluk avissaartuisitsineranik tunngaveqarpoq, misigittaatsutullu oqassagaanni pissanganarluinnartumik isiginnaagassialiarineqarsinnaavoq. Nuummi meeqqat angerlarsimaffianni meeqqat kalaallisut oqaloqqusaanngillat. Meeqqat 22-t arlaannaasaluuniit ilaquttatik takoqqinngilaat inooqatigileqqinnagillu. Filmillu aqqa "Eksperimentet", tassa kalaallisut "Misiliut", Louise Friedbergip oqaluttuamut tulluartuusoraa.
- Taamanikkut pisoq misiliutitut taaneqartarpoq, oqaatsimullu misiliummut sukangassuseq imaluunniit misigittaassuseq attuumassuteqarpoq, taamanikkut politikkerineqartutut oqaatigineqarsinnaalluni, Louise Friedberg oqarpoq.
Misiliut iluatsinngitsoq pillugu oqaluttuaq ukiut 50-it matuma siorna pisuugaluartoq suli ullutsinnut attuumassuteqartoq, Louise Friedberg isumaqarpoq.
- Oqaluttuarisaanermi annernartut misigisat isigineqartarnissaat pingaaruteqartoq isumaqarpunga, tassami taama iliornikkut ingerlariaqqinniassaagut. Oqaluttuarisaaneq ilisimagaanni taava ingerlariaqqittoqarsinnaavoq. Neriuppunga uuma kingunerisaanik Danmarkimiit Kalaallit Nunaata soqutigineqarnera anneruleqqissasoq, tassami ataatsimoorussatsinnik oqaluttuarisaanikkut misigisaqarpugut. Innarliineq naapertuilluanngitsuliorneruvoq, nipangiussisoqaannartillugulu innarliineq suli ingerlanneqassaaq, Louise Friedberg oqarpoq.
