Meeqqat kanngutaatsuliorfigineqartut katsorsartarfissaanik illumik !
Taamaammat peqatigiiffiup meeqqat illua tamakkiisumik katsorsartiffiusinnaasoq pilersinniarlugu suliniutigaa.
Line Frederiksen ima oqarpoq.
Tarnit nakorsaat isumaginninnermullu suliallit, kiisalu aningaasat katsorsaanissamut atugassat amigaataanerat pissutaalluni tamakkiisumik katsorsaasoqarneq ajorpoq. Inersimasunngornermi tarnikkut kingunerlutitsisoqarsinnaavoq, ilaatigut meerartaarnermi meeqqanut naliginnaasumik attaveqarsinnaannginneq, sumiginnaaneq. Ilinniakkamik naammassinnissinnaannginneq, nalinginnaasumillu ulluinnarni inooqataanissamut nukissaqannginneq. Naatsumik oqaatigalugu atornerlugaasimasut pisuussutiginngisaminnik inuiaqatigiinni appasinnerpaatut inississinnaasarput. Taamaammat kialuunniit kinguaasiutitigut atornerlunneqarsimasup tamakkiisumik katsorsarneqarsinnaalernissaa qulakkeerusupparput.
Siunissarlu ungasinnerusoq eqqarsaatigalugu Kalaallit nunaanni kinguaassiutitigut atornerluisarnerup annikillisinnissaa angorusullugu siunertaraarput. Meeqqat Inuunerissut siulittaasua Line Frederiksen oqarpoq.
Naatsorsueqqissaartarfimmi kisitsisit kingulliit 2007-mersut malillugit meeqqanik kinguaassiutaasigut atoqateqarsimasutut pasineqartut 41-it akornanni 37-it pisuutinneqarlutik pineqaatissinneqarsimapput.Nuummi ataatsimeersuarnissaq aqagu pingasunngornermi aqaguagulu sisamanngornermi ingerlanneqartussaq taaguuteqartinneqarpoq, Kalalallit Nunaanni Meeqqat Illuat.
Ataatsimeersuarnermi peqataasut, meeqqat illuata qanoq aaqqissoorneqarnissaa, suliassat suut inaassaneqassanersut aammalu ilisimasallit sorliit meeqqat illuanni sullississanersut oqaluuserineqassapput. Tamatuma saniatigut Kalaallit Nunaanniit, USA-miit, Islandimiit aamma Danmarkimiit immikkut ilisimasallit ataatsimeersuarnermi peqataassapput, taakkua ataatsimeersuarnermi peqataasut annertuumik isumassarsiortissallugit. Ataatsimeersuarnermi inuit 60-it missaat peqataassapput, isumaginninnermut naalakkersuisoq Maliina Abelsen siuttoralugu.
