Meeqqat isummersortarfiat Nuummi ataatsimeerngaassaaq
Ukiormanna meeqqat isummersortarfiata sulinerani qulequtaavoq angajoqqaat akisussaanerat ullumilu aqagulu ataatsimiinnermi siunnersuutinik qulinik suliaqarniarput meeqqat inuusuttullu Nunatsinni inuunerat pitsanngorsarniarlugu angajoqqaat qanoq iliorsinnaanersut. Meeqqat isummersortarfiata Nuummi pisussanng0rnera Nakuusamut angusaavoq annertooq taakkulu ukiuni tallimani atuuttussamik Unicef Danmark aamma Namminersorlutik Oqartussat isumaqatigiissusiorfigisimavaat maannalu aamma Bikubenfondenimiit tapiiffigineqarlutik.
- Meerartatta inuusuttortattalu siunissaq pigigaat upperaarput. Suliap pissanganartup tapiiffigineqarnera nuannaraarput, taakkumi taakkununnga tunngasunut aalajangiinernut ilaatitsinissaq qulakkiissavaa. Tamanna meeqqat toqqissisimanissaannut kalaallillu inuiaqatigiivinut pingaaruteqarpoq, taama oqarpoq Bikubenfonden-imi pisortaq Søren Kaare-Andersen.
Ullumi meeqqat isummersortarfianni ilaasortat kaammattuutinik qulinik suilaqassapput taakkulu Inatsisartut ataatsimiittarfianni aqagu tusarniaassutigineqassapput. Soqutinnittut tusarniaarneq taanneq malinnaaffigisinnaavaat KNR2 aqqutigalugu tassanimi tusarniaaneq toqqaannartumik aallakaatinneqassaaq. Tassani isummersortartut saniatigut atuartut 40-ut, meeqqat illersuisuat Aaja Chemnitz Larsen aamma naalakersuisoq Mimi Karlsen najuutissapput. Unicefip Namminersorlutik Oqartussat suleqatigalugit suliniut tapersersorpaa isumalluarfigalugulu.
- Meeqqat isummersortarfiat meeqqat inuusuttullu Kalaallit Nunaanniittut tusaaneqarnissaannik periarfissippai. Innersuussutit oqalliffimiit pinngortut pillugit Namminersorlutik Oqartussat suleqatigineratigut suliaqqiinissarput qilanaaraarput, taama oqarpoq UNICEF Danmarkip allattuunera Steen M. Andersen.
