Meeqqat inuusuttuaqqallu kinguaassiutitigut nappaateqarput
Nunatsinni niviarsiaqqat amerlasuut 15-it inorlugit ukiullit kinguaassiutitigut nappaatinik tunillatsittartut, Nunatsinni nakorsaaneqarfiup 2010-mi nalunaarusiaani Kisitsisit ukiunik marlunnik pisoqaassuseqaraluartut ajornartorsiut suli atugaavoq.
Maniitsup peqqissaaviani piffissami kingullermi inuusuttuaqqat 15-it inorlugit ukiullit kinguaassiutitigut nappaateqartut siumorneqartartut peqqinnissamut ikiorti Karoline Olsen Maniitsup tusaataata Akisuasup KNR suleqatigalugu sapaatip akunnera kingulleq aallakaatitsinerani oqarpoq.
Nunatsinni nakorsaaneqarfiup kisitsisaatai kingulliit 2010-meersuupput tassanilu takuneqarsinnaavoq nuna tamakkerlugu niviarsiaqqat 15-it inorlugit ukiullit 46-ut chlamydiamik tunillatsissimasut nukappiaqqallu marluk 15-it inorlugit ukiullit chlamydiamik tunillatsissimasut.
Gonorré eqqarsaatigalugu nuna tamakkerlugu niviarsiaqqat 15-it inorlugit ukullit 19-it 2010-mi tunillatsissimaput nukappiaqqat tallimat 15-it inorlugit ukiullit gonorrémik tunillatsissimasut.
- Ajoraluartumik nassuerutigisariaqarparput kinguaassiutitigut nappaatit atugaanerat qangatut annertutigileriartortoq, Qeqqata peqqissaaviani nakorsat pisortaat Ove Rosing Olsen KNR-imut oqarpoq.
Kingumullu qiviaraanni chlamydiamik aamma gonorrémik tunillatsittut 1996-ip kingorna amerliartorsimasut.
- Taamaattumik pitsaaliuinermik suliniarnerput annertusivarput, Ove Rosing Olsen oqaluttuarpoq.
- Sisimiuni Maniitsumilu illoqarfiit radioi suleqatigalugit ajornartorsiut sammineqarpoq. Aamma Sisimiuni illoqarfiup aviiseeraani Sivdek´-mi ilanngussaqarpugut. Taakku saniatigut kinguaassiutitigut nappaateqarnermut ilisarnaataasinnaasut peqqissaavinni sulisut eqqummaariffigaat. Ilisarnaatit tassaasinnaapput amerlunnerit imaluunnit nutsat katannerat, Ove Rosing Olsen nassuiaavoq.
Chlamydia eqqummaariffigineqarnerulernera 1980-ikkut qeqqanni aallartipput ukiullu ingerlaneranni kinguaassiutitigut nappaammik tassannga tunillatsittut 13-nik ukiulinniit 75-it tikillugit ukiullit siumorneqarput.
Kisitsisit
Chlamydia 2010:
Arnat: 1.772
Angutit: 1.235
Gonorrè 2010:
Arnat: 699
Angutit: 540
