Meeqqat inuusuttuaqqallu angerlarsimaffiup avataanut inissinneqartarnerat
Meeqqat inuusuttuaqqallu angerlarsimaffiit avataannut inissinneqarsimasut atugaasigut qanoq ililluta pitsaanerulersitsisinnaanissarput pillugu Inatsisartuni ilaasortap attaviitsup Esmer Bergstrømip apeqquteqaatitut oqillisissiaa Inatsisartuni ullumi oqallissutigineqarluarpoq.
Esmer Bergstrømip meeqqat angerlarsimaffiup avataanut inissitaasimasut atugaasa naammaginannginnerat taamaalillunilu pitsaanerusumik atugassaqartitaalernissaat ujartorpaa. Tassunga atatillugu angajoqqaarsiaqartitsisarneq, angajoqqaarsiaasartullu atugaannut tunngasut, soorlu aningaasaqarnermut tunngasut aamma apeqquteqarfigai. Taakku saniatigut angajoqqaarsianik pikkorissartitsisarneq angajoqqaanillu pikkorissartitsisarneq aamma ilanngullugit apeqquteqarfigalugit.
Ilaatigut ulloq unnuarlu angerlarsimaffinnik amerlanerusunik pilersitsinissamut Naalakkersuisut pilersaaruteqarnersut Esmer Bergstrømip paaserusuppaa.
Esmer Bergstrømip oqillissaarutigalugu apeqquteqaataa Inatsisartuni partiinit tamanit tigulluarneqarpoq.
Ilaqutariinnermullu Naalakkersuisoq Aleqa Hammond akissuteqarnermini erseqqissaavoq, meeqqat angerlarsimafiup avataanut inissinneqarsimasut atugaasa pitsaanerulernissaat anguniarlugu maannakkut suliniuteqartoqareersoq.
- meeqqat inuusuttuaqqallu ikiorsiivigineqartarnerat pillugu peqqussut, meeqqap pisariaqartitaanut iliuusissanik taamaallaat aalajangersaaviuvoq. Imaappoq meeqqap pisariaqartitai salliutineqartarput. Siunertaavortaaq siusinaartumik iliuuseqartarnissaaq, pisariaqarpat naartulernermiit ingerlanneqartumik. Imaappoq aanngajaarniutinik imigassamillu atornerluinerit aappariinnermi persuttaasoqarnerit tarnikkut nappaatit allallu pissutaappata, meeqqap inuunermik pitsaasumik aallartitsinissaa qularnaarniarlugu iliuuseqartoqassaaq. Aleqa Hammond nassuiaateqarpoq, erseqqisaatigaalu meeraq ikiorneqarnissamik pisariaqartitsippat iliuusissat pisariaqartut kommunimit aallartinneqartassasut.
Esmer Bergstrømip meeqqat angerlarsimaffiup avataanut inissitaasut atugaannik pitsaanngorsaanissamut apeqquteqaatitut oqallisissiaa Inatsisartuni akunnerit marluk sinnerlugit oqallissutigineqarpoq.
