Meeqqat inuunerissuunissaat eqqartussavaat

Peqatigiiffiit sisamat ullormi pisussanik aaqqissuisuusut tassaapput nunatsinni piumassutsimik aallaaveqartumik meeqqanik sullissisartut: Meeqqat Inuunerissut/Bedre Børneliv, Red Barnet, Nanu-børn aamma Foreningen Grønlandske Børn.

- Meeqqanut inuussuttunullu nunatsinni suliniutigisagut pilersaarutigisagullu akunnitsinni ataqatigiissaagaasumik ingerlatilernikuuagut. Tamatta immikkut sulinitsinni naleraqarpugut, taamaakkaluartoq anguniakkatta qiterisaat assigiillutik, tassalu nunatsinni meeqqat tamat pitsaasumik inuunissaannik aqqutissiuusserusunneq, Attaveqaqatigiilernikkut suliniutigut nukittortinneqarput, Naja Kleist Storch Red Barnet-mi ineriartortitsinermut siunnersorti oqarpoq.

Taamaammat aamma FN-ip ataani meeqqanut isumaqatigiissutip ukiut 21-nngortorsiutiginera ataatsimoorunniarpaat.

- Meeqqat pillugit suliniaqatigiiffiit sisamaasut tamarmik FN-ip ataani meeqqat pisinnaatitaaffii pillugit isumaqatigiissut aallaavigalugu sulisuunerput takutinniarparput. Peqatigiilluta oqaluttuussiniarpugut meeqqanut isumaqatigiissut sunaanersoq qanorlu iliorluta taanna tunngavigalugu uagut suliniarnerput ingerlannerlugu, Krissie Winberg Berthelsen Nanu Børn sinnerlugu oqarpoq.

Suliniaqatigiiffiit tamarmik, piumasut tamarmik Katuamukarlutik ullormi malunnartitsiniaqataanissaannik kajumissaarutigaat.

Takkuttut namminneq qanoq namminneq Inatsisartuni issiagaluarunik meeqqanut iliuuseqassagaluarnerminnik saqqummiussuisinnaassapput.

- Aaqqissuineq naammassippat, taava saqqummiussuunneqartut meeqqaneersuusinnaasut inersimasuneersuusinnaasullu tamarmik Naalakkersuisut Siulittaasuannut Kuupik Kleist-imut aammalu Inatsisartut siulittaasuannut Josef Motzfeldt-imut tunniunneqassapput. Tassami maanna ingerlatat pitsaasut amerlareeraluaqisut politikerinik eqeersaajuarnissaq suli pisariaqarpoq, Line Frederiksen Meeqqat inuunerissut MIBB sinnerlugu oqarpoq.