Meeqqat Inuunerissut: Qinersileruit meeqqat atugaat eqqarsaatigikkit

Meeqqanut inuusuttuaqqanullu suliassaqarfimmi pilersaarusiat aalajangersimasut ataqatigiissaakkallu maqaasillugit "Meeqqat inuunerissut" siulersuisunut ilaasortaq Line Frederiksen oqarpoq.

- Atuartartup allagai ammasut qiviarukkit taava kisitsisitigut paasissutissat tamaasa takussavatit, taakkualu tamarmik nikalluallannaqaat. Pingaarnerpaatut isumaqarpugut naalakkersuinermik suliaqartut nalunaarusiat taakkua tunaartariniarlugit aallartissinnaasariaqartut, periaatsikkut kukkusoqarsimaneranik pissuteqartillugit imaluunniit isumaqatigiinnginnerit suut qanoq nassuiarneqarsimanersut isumaqatigiinngissutiginerat pissutigalugu sussakkiiginnarnagit. Suliassat tassaniittut malitseqartinneqarnissaat maqaasivarput. Ilaqariinnermut Pisortaqarfiup meeqqanik sumiginnaaneq pillugu paasititsiniaanini naammasseqqammerpaa, taakkualu iluatsinnerarpaat, uagulli malitseqartitsinissaq maqaasivarput. Kikkut matutsinnukassappat nalunaarutiginninnerillu amerliartortut suliarinissaannut suli amerlanerusunik sulisussarsiussallugit?

-Maannali qineqqusaarnermi partiit tamarmik oqarput meeqqat inuusuttuaqqallu pitsanngorsaaviginiarlugit.

-Aap, kisianni aalajangersimasumik oqanngillat, neriorsuutit ima aalajangersimanngitsigaat aalajangiusimasaqarnissartik ajornartorsiutigalugu. Soorlu Atuarfitsialak, pilersaarut annertooq kusanartorlu, kisitsisitigulli paasissutissat takutippaat ilinniartitsisut 30%-ii amigaatigineqartut. Tassanngaanniit aallartissinnaavugut, ajornartorsiutip tamatuma aaqqiiviginissaanut aalajangersimasunik siunnersuuteqarnitsigut.