'Meeqqat Inuunerissut' Naalagaaffiit Peqatigiit komitéa naapippaat

Suliniaqatigiiffiup 'Meeqqat Inuunerissut' Naalagaaffiit Peqatigiit meeqqat pisinnaatitaaffii pillugit komité-a ullaap tungaa ataatsimeeqatigivaa.

Tamanna pillugu "Meeqqat Inuunerissut" siulittaasuat Line Frederiksen ima oqarpoq:

- Ataatsimiinneq ingerlalluarpoq. Kalaallit Nunaanni pissutsit immikkut ittut apersuutigineqarput. Naalagaaffiit Peqatigiinnillu Nunatsinni naalakkersuisunit aqunneqanngitsunik, uatsitut ittunik, ataatsimiigiartoqarnera nuannaarutigineqarpoq, Line Frederiksen Geneve-mi ataatsimeeqataasoq oqarpoq.

Ataatsimiinnermi suummita oqariartuutit 'Meeqqat Inuunerissut'-nit ingerlateqqinneqarpat?

- Meeqqat isorliunerusuni peroriartortut aamma meeqqat illoqarfinni peroriartortut, peroriartornerat assigiinngitsorujussuupput. Soorlu ilinniagaqarnikkut, peqqinnissaqarfimmit isumagineqarnikkut, allatigullu assigiinngissuteqaqaat. Nunaqarfinni imaluunniit illoqarfinni mikinerusuni ineriartorneq killeqarnerujussuuvoq.'Meeqqat Inuunerissut' kissaatigaat, Naalagaaffiit Peqatigiit meeqqanut komitéata Kalaallit Nunaanni naalakkersuisut kaammattussagaat, meeqqat atugarisaat pillugit pingaarutilinnik aaliangiissasut, Line Frederiksen oqarpoq.

Naalagaaffiit Peqatigiit meeqqat atugarisaat pillugit komitéata Kalaallit Nunaanni naalakkersuisut meeqqat pillugit aappaagu paasiniaasussaapput.

- Naalagaaffinni Peqatigiinni isumaqatigiissutit Kalaallit Nunaanni malinneqarnersut misissuiffigineqartussaapput. Ilinniarsimasunik atorfinitsitisinnaanngikkaanni qanoq iliuuseqartoqartarnersoq misissuiffigineqassaaq, Line Frederiksen oqarpoq.

Naalagaaffiit Peqatigiit meeqqat pillugit isumaqatigiissutaannik malinninnissamik Kalaallit Nunaat pisussaavoq. Naalakkersuisut isumaqatigiissut malinnagu ingerlatsinerarlugit, Naalagaaffiit Peqatigiit naliliissappata, naalakkersuisut pinngitsaalillugit meeqqanut iliuuseqaqqunissaannut, Naalagaaffiit Peqatigiit pisussaaffeqanngillat.

- Naalakkersuisut iliuuserisaannut aningaasatigut kinguneqartitsisinnaanngillat, kisiannili iliuusaat maluginiarneqaannassalluni.