Meeqqat Illersuisuat: Meeqqat pisinnaatitaaffii Sanami nukittorsarneqartariaqarput
Meeqqat Sullissiviat MIO Dronning Ingridip Napparsimmaviani meeqqat uninngasarfiannut ilisimasanik katersiartorluni pulaarsimavoq. Meeqqat uninngasarfiata Naalagaaffiit Peqatigiit Meeqqat pillugit Isumaqatigiissutaannik naammassinnissimanersoq Meeqqat Illersuisuata qularaa.
Meeqqat napparsimasut meeqqat uninngasarfianni taamaallaat uninngatinneqanngillat, inissaaleqinermi peqqutigalugu meeqqat ilaat inersimasut napparsimasut akornanni uninngatinneqarmata.
- Meeqqat, ilaat ajorunnaarsinneqarsinnaanngitsunik nappaatillit, inersimasut napparsimasut ilaannilu anniaraangamik nipituumik kappialasartunik ajornerpaaffianilu toqusartunik ineqateqartinneqarnerat, meeqqat unitsinneqarneranni toqqissisimanissaannik qulakkeerinninnerunngilaq, Aaja Chemnitz Larsen oqarpoq.
Taamatuttaaq meeqqanik sullissisussatut ilinniarsimanngitsunik sulisoqarnera isornartorsiorpaa kiisalu meeqqanut sivisuumik napparsimasunut ilinniartitsisoqannginnera aamma oqaloqatiginnittarfinnik nakorsanik meeqqat nappaataat pillugit oqaloqatiginniffiusinnaasunik amigaateqarnera isornartorsiorpaa.
Meeqqat unitsinneqarneranni pisariaqartitaannik naammassinnissinnaasumik immikkut uninngasarfeqalernissaat Meeqqat Illersuisuata kissaatigaa, tamannalu siornatigut anguniarneqarsimagaluarpoq. Nalunaarusiaq Inatsisartunut 2008-mili saqqummiunneqarmat kingornatigut susoqarsimanngitsoq Meeqqat Illersuisuata ilisimatitsissutigaa.
Meeqqat Dronning Ingridip Napparsimmavianut unittartut nuna tamakkerlugu aggersuupput, taakkulu ilaatigut kræftimut, gigtimut uummatikkullu nappaatinut katsorsarneqartarput.