Meeqqat illersuisuat: Kommune Kujalleq meeqqat atugaat pillugit pitsaasumik alloriarpoq

Kommune Kujallermi Isumaginninnermut ataatsimiititaliaq suliassaqarfimmi suliaqartut peqatigalugit meeqqat inuusuttullu sumiginnarneqartut iliuuseqarfigineqarnissaat pillugu sapaatip akunnerata siuliani isumasioqatigiisitsivoq. Aamma suliassaqarfiit meeqqat atugaannik tunngassuteqartunik suliaqartut akornanni suleqatigiinneq pingaaruteqaqisoq ataatsimiissutigineqarpoq.

- Nuannaarutigivara takullugu, meeqqanut inuusuttunullu pisariaqartitsisunut kommuni iliuuseqarnissaminut suliniummik aallartisaanera. Taamak iliuuseqarneq meeqqat pisinnaatitaaffiisa malinnissaannut alloriarneruvoq pitsaasoq, Meeqqat Illersuisuat Aviâja Egede Lynge tusagassiorfinnut nalunaarummi allappoq.

Meeqqat illersuisuat Aviâja Egede Lynge aamma borgmesteri Jørgen Wæver Johansen meeqqat pisinnaatitaaffii pillugit Kommune Kujallermi suleqatigiinnissamik aasamut pilersaaruteqarput.