Meeqqat illarlutillu ilungersunartunik eqqartuipput

Ataatsimeersuarnermi ilaatigut Nunatsinni meeralluarneq suunersoq peqataasunit eqqartorneqartussanut ilaavoq. Qulequtaq peqataasut ilaannut immaqa sakkortusinnaasoq. Taamaattumik ataatsimeersuarnerup ammarneqarnerani peqataasut quiasaarisartumit Piitannguaq Alaufesen-imit aliikkusersorneqaqqaarallarput

Ataatsimeersuariaqataasut sunik pisinnaatitaaffeqarnerlutik sunngiffimmilu sammisassaqartitsinermut qanoq sunniuteqarsinnaanertik aamma paasisaqarfigisussaavaat.

Naalagaaffiit Peqatigiit FN-ip meeqqat pillugit suliniaqatigiiffianit UNICEF-imit Namminersorlutik Oqartussat suleqatigalugit meeqqanik inuusuttuaqqanillu ataatsimeersuartitsineq ingerlanneqarpoq. UNICEF-iminngaanniillu neriuutigineqarpoq politikerit aalajangiilernerminni meeqqat isumaat tusaaniarnerulissagaat.

- Kalaallit Nunaanni ataatsikkut pisorpassuaqarpoq. Namminersorlutik Oqartussat meeqqanut tunngasunik arlariinnik kusanartunik suliaqarput. Maanilu meeqqat innersuussutigisaat sulianut taakkununnga ilanngunneqassapput, taamaalilluni Namminersorlutik Oqartussat, inersimasut aammalumi politikerit meeqqat oqariartuutaannut tusaaniassammata, Anne Mette Friis, UNICEF Danmarkimi meeqqat inuusuttuaqqallu suliniarfigineqarneranni pisortaq oqarpoq.

Henriette Johansen, 13-inik ukiulik Qasigiannguaneersoq, Nunatsinni meeraanermi atugassarititaasut ullumi eqqartuiffigineqarat nuannaraa.

- Eqqartuinerput nuannaraara. Aamma eqqartukkavut amerlasoorujuupput. Uangalu meeqqat ikiorneqarnissaannut suliniuteqarusuppunga. Tassami meeqqat ajornartorsiutillit ikiorusukkakkit, allat aamma nuannaaqatiginissaat pinerullugu, Henriette Johansen oqarpoq.

Ataatsimeersuarnerup ulluani siullermi pisinnaatitaaffilerineq, Nunatsinni meeraalluarneq, attaveqarneq avammullu saqqummiussisinnaaneq sammineqarput.

Meeqqat inuusuttuaqqallu ataatsimeersuarneranni ataaseq peqataasinnaajunnaarpoq, allali ataaseq Ittoqqortoormiuniit peqataasussaq aatsaat ullumi tikissaaq.