Meeqqat ileqqaartsinneqartarnissaannut tapersiipput
Meeqqanut ileqqaaruteqartitsisalernissaq, Siumut sorsuutigisaa, Inatsisartuni ullumi siullermeerneqarpoq. Meeqqanut ileqqaaruteqartitsisalernissaq Siumut Inuit Ataqatigiillu naalakkersuisooqatigiinnerannik siorna ajalusoortitsivoq, Inuit Ataqatigiit peqataarusunngimmata.
Massakkulli meeqqanut ileqqaaruteqartitsinissamut isumaat mumissimavoq, oqarpummi siunnersuut tunngaviatigut isumaqatigigitsik. Inuit Ataqatigiit oqaaseqartuat Olga Poulsen Berthelsen aperaarput sooq ileqqaaruteqartitsinissamut isummernertik mumissimaneraat:
-Maluginiassallugu pingaaruteqarpoq pineqartoq annertuumik isumaqatigiinninniutigineqareerluni siunnersuutigineqarpoq, takuneqarsinnaavorlu inooqataaffigineqarsinnaasoq, taamaattumik Inuit Ataqatigiit akuersaarpaat.
Meeqqat siunissami namminneq pilersorsinnaalernissaannut ileqqaaruteqartitsinissaq pingaaruteqarmat Inuit Ataqatigiit siunnersuummut akuersaarput.
- Taasuma saniatigut aningaasat ileqqaarutigineqartussat nunatsinnut iluaqutaasussaapput. Siunnersuutigineqartoq naalakkersuisooqartigiinnermi isumaqatigiissutaavoq. Olaga Polusen Berthelsen oqarpoq Inuit Ataqatigiit pingaartikkaat naalakkersuisooqatigiinnermi isumaqatigiisutinik eqqortitsinissamut akuersaareeramik tapersersuinissaat pingaaruteqartoq.
Ileqqaaruteqartitsisalernissaq meeqqanut ukioqanngitsuniit 18-inik ukiulinnut tunngavoq. Ukiumut 1000 koruuni toqqarneqartassaaq meeqqallu 18-inik ukioqalereeraangamik 25.000 koruuninik pissarsisinnaalissapput. Siunnersuummut Demokraatit Kattusseqatigiillu akerliusut Atassut arlalinnik apeqqusiigaluarluni tunngaviatigut isumaqataavoq.
Ileqqaaruteqartitsisalernissamik siunnersuut Inatsissartuni aappassaaneerneqartigani Aningaasanut kiisalu Akileraartarnermut ataatsimiititaliani suliarineqartussanngortinneqarpoq.
