Nuummi imigassartorsimallutik aalakoorlutillu biilertut politiinut kisimik ajornartorsiortitsisuujunnaarput, tassa meeqqat inuusuttuaqqallu aamma biilinik aallarussiniartarneri amerlattikkaluttuinnartut Nuummi politiit ilisimatitsipput.
Nuummi tallimanngornermiit ullumikkumut biilinik aallarusseqattaarnerit arfineq marluk angullugit pisimapput, tamatigullu meeqqat nukappiaraanerusut qulingiluaniit 15-it angullugit ukiullit aallarussisuusarsimallutik, Nuummi politeeqarfimmi pigaartuusoq Per Langborg taama oqaluttuarpoq.
- Meeqqat inuusuttuaqqallu pineqartut ilaat sapaatip akunnerata naanerani, Nuussuarmi illoqarfiup immikkoortuani Nigerlermi biilinik aallarusseriaraluarlutik napparummut aporput, aquttua mikivallaarluni
igalaakkut isigisinnaasimanngimmat, qujanartumillu meeqqat annertunerusumik ajoqusinngillat, biilili aallarussaq ajoquserpoq, Per Langborg oqarpoq.
- Ingammik biilit Toyta Tercelit aallarunneqartarput, matuersaatinik sunilluunniit atorluni ammerneqarnissaat ajornanngitsuaraarsuusoq paasinarmat. Taamaattumik ingammik Toyta Tercelinik biilillit aquummut parnaarummik peqarnissaat inassutiginartoq, Per Langborg oqarpoq.
Nunatsinni illoqarfimmi aamma biileqarluartumi tassa Sisimiuni inuusuttuaqqat 13-nik 14-inillu ukiullit aamma biilinik aallarussisartut tamannali qaqutigoortuusoq Sisimiuni politiit ilisimatitsipput.