Meeqqat atugarliornerunerat peqqinnissaqarfiup kisimi akisussaaffigerusunngilaa

Akisussaaffik ilaqutariinniippoq, atuarfimmiippoq sunngiffimmilu sammisassaqartitsisuniilluni, Peqqinnissaqarfimmi pisortaaneq Ann Birkekær Kjeldsen erseqqissaavoq.

Meeqqat Inuusuttullu Pillugit Ilisimasaqarfiup, MIPI-p, meeqqat inuiaqatigiinni inissisimanerat aallaavigalugu, peqqissusiannik misissuisimaneranut atatillugu inerniliussat ippassaani saqqummermata, pingaartumik meeqqat nunaqarfinni isorliunerusunilu najugallit illoqarfinni annerusuneersunit atugarliornerunerat allaaserineqarpoq.

Meeqqat sisamanik ukioqarnerminni atualeraangamillu nakorsamit misissortinnissaat kapitinnissaallu pingaaruteqartoq peqqinnissaqarfimmit isumagineqarneq ajortoq, saqqummersitami assersuutigineqarpoq. Peqqinnissaqarfimmi pisortap tamanna ilumoornerarpaa.

- Arlaannik ajortoqarpoq. Meeqqat sinerissamiittut peqqinnissakkut assigiinngitsumik atugassaqartitaanerat takuneqarsinnaavoq. Aammami inersimasut akornanni pissutsit taamaapput, Ann Birkekær Kjeldsen oqarpoq. Inatsisartut peqqinnissaq pillugu nalunaarutaat naapertorlugu innuttaasut illoqarfimmi nunaqarfimmiluunniit najugaqaraluarunik assigiinngisinneqartussaanngillat. Kisianni tamatuma eqquutsinneqannginnera takusinnaasoq, Ann Birkekær Keldsen oqarpoq.

- Paasivara meeqqerisunik immikkut misissuisussanik aamma akiuussutissalerisussanik qaqutiguinnaq nunaqarfinnukartitsisoqartartoq. Uagulli kisitta pisunut akisussaanngilagut, oqarpoq.

- Meeqqat namminneq periarfissaat uani aamma pineqarput, angajoqqaavisa imaqarluartumik inuunissaannut periarfissat aamma apeqqutaasarput. Meeqqat peqqissusiannut sunniuteqartut sorpassuusinnaapput, Peqqinnissaqarfimmi pisortaq oqarpoq.

Najukkami peqqissaaveqarnersoq kisiat apeqqutaannginnerarpaa.

- Akiuussutissanik kapitinnerit misissortinnerillu meeqqat aalajangersimasumik ukioqaleraangata soorunami aqqusaagassaasarput, eqqaamasariaqarporli pinartumik nakorsartariallit sinerissami tamarmi salliutinneqartarmata, Ann Birkekær Kjeldsen oqarpoq.

Taamaammat angajoqqaat meeqqamik nakorsiaanneqarnissaannut pikkorinnerusariaqarnerarpai.

Meeraq inunngoraangat angajoqqaanngortunut atuagaaraq meeqqat naalungiarsuunerminniit inuusuttuaranngornermi tungaanut misissortittarnissaanik akiuussutissanillu kapitittarnissaanik imaqartoq, tunniunneqartarpoq.

- Tassani allassimasut malillugit angajoqqaat najukkami nakorsaqarsimanngippat nakorsap tikinnissaanut atatillugu meerartik piffissamik inniminniissussinnaagaat.

- Oqaannassapput, meerara sisamanik ukioqalerpoq, nakorsamit misissortittariaqalerpoq, Ann Birkekær Kjeldsen oqarpoq.

Paasissutissat amigarsimappata, peqqinnissaqarfik paasisitsiniaaqataassaaq.

Ann Birkekær Kjeldsenip ilimaginngilaa nunaqarfinni isorlernilu peqqinnissaqarnermut siunissami aningaasaliisoqarnerussasoq, ilimagineruaali aningaasaliissutaareersut iluanni tulleriiaaqqinnikkut pissutsit ilorraap tungaanut saatinneqarsinnaassasut, soorlu isumaginnittoqarfiit atuarfeqarfiillu suleqatigiinnerulernerisigut. Paasisiniaanerli amigarpat iliuuseqarsinnaanerarput.

Isumaginninnermut, Peqqissutsimut aamma Ilinniartitaanermut naalakkersuisut pingasuullutik qaammatikkaartumik aamma ataatsimiittalereersut oqaatigaa.