Meeqqat atugarisaat pillugit Anders Fogh Rasmussen suliakkerneqarpoq

Meeqqat pisinnaatitaaffii pillugit Naalagaaffiit Peqatigiit isumaqatigiissutaata Naalagaaffeqatigiinnerup iluani, taamalu aamma Kalaallit Nunaanni, unioqqutinneqannginnissaa, ministeriunerup Anders Fogh Rasmussenip sulissutigissagaa, Danmarkimi Socialdemokratit piumasaraat.
Allattoq Jaaku Lyberth
januaarip 22-at 2009 17:20

Socialdemokratit Kalaallit Nunaannut tunngassuteqartunut oqaaseqartittagaat Mogens Jensen oqarpoq meeqqat pisinnaatitaaffii pillugit Naalagaaffiit Peqatigiit isumaqatigiissutaata Kalaallit Nunaannit unioqqutinneqarnera UNICEF-ip oqaatigissaguniuk tamanna tusaanngitsuusaaginnarneqarsinnaanngitsoq.

Meeqqallu ilaasa kaallutik innaannartarnerat soorunami akuerineqarsinnaanngilaq. Taamaammat ministeriunerup Anders Fogh Rasmussenip maanna qulakkeertariaqarpaa Kalaallit Nunaat isumaqatigiissummik malinninnersoq, Mogens Jensen Radioavisimut oqarpoq, ilanngullugu meeqqat atugarisaat pillugit Naalagaaffiit Peqatigiinni suliniaqatigiiffik UNICEF iliuuseqarnialermat pissusissamisoorneralugu. - Naalakkersuisut qanoq iliuuseqarnissaannut UNICEFip siunnersuusiornissaa pissusissamisoorpoq. Naalagaaffiit Peqatigiit suliniaqatigiiffiisa ilaat oqarpat Kalaallit Nunaanni ajornartorsiortoqartoq, taava iliuuseqartariaqarpugut, Socialdemokratit Kalaallit Nunaannut tunngassuteqartunut oqaaseqartartuat Mogens Jensen oqarpoq. Kisitsisit 2006-imerpata nutaaneruppataluunniit apeqqutaanngitsoq taassuma aamma oqaatigaa, maannangaaq iliuuseqartoqartariaqarnera pingaarnerutikkamiuk.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq