Meeqqat atuartut nerisaqarluarnissaat pingaarluinnarpoq

Iluamik ullaakkorsiortitaasannginneq atuariartornermilu taquaqartitaasannginneq, soorunami meeqqap angusaanut kinguneqapiluttarpoq. Tamanna nunatsini meerarpassuarni ajoraluartumik takornartaanngilaq, angajoqqaarpassuaqarmat meeqqamik atuarneranni nerisaqarluartitsinissamut nukissaqanngitsunik. Atuarfitsialammi ilinniartitsisut ilaata Lone Kokholmip, Nuummi Kangillinnguit atuarfianni ilinniartitsisuusup tamanna misilittagaqarfigaa:

- Ilinniartitsisuulluni malunnartartorujussuuvoq meerarpassuit ilaat qasusut killeqartumillu malinnaasut. Taava ilaat soorlu nikallunganerusut, aturtunut sinilluarsimasunut nerilluarsimasunut taqualinnullu sanilliullutik. Atuartut sinilluarsimasut nerilluarsimasut taquaqartitaasullu illuatungaanilu taama isumagisaanngitsut assigiinngissutaat assut malunnartarpoq.

Meeqqat nerisaqarnikkut isumagilluangaannginnerat angusaasigut malunnartartoq Lone Kokholm oqarpoq.

- Takussaasarpoq nerisaqarsimanngikkaluarlutik taquaqartinneqanngikkalualutilluunniit ilanngui tupinnaannartumik malinnaallaqqittartorujussuupput. Tupinnaannartumik pinertoqaat. Qaalinngikkaluarlutik pissaanertik nukigalugu ulloq atuarfik naasinnaasarpaat, angerlalutillu aatsaat nerisinnaasarlutik. Ilannguili tunniutiinnaqqajaasarput, qasullutik, ullullu ingerlanerani immaqa angerlarsimagunik uteqqinngitsoortarlutik. Ilai nerikulanngitsut qasoqqanerusarput, inortuikulasarput, immaqalu aningaasaateqarsimagunik nerisinnaasaminnik kimeqarpianngitsunik niuertarfimmut pisiniartarput, karakteeriinullu kinguneqartarluni. Qaammammiit qaammammut naatsorsuutini takuneqarsinnaasarpoq kikkut oqaloqatigineqartariaqalernersut kikkullu angajoqqaavi aamma oqaloqatigineqartariaqalernersut.

Tamanna pillugu meeqqat tamarmik nerisaqartitaanissaat Kone Kokholmip kissaatigaa.

- Kialluunniit taanna assortorsinnaanngilaa, aamma uagut inersimasut ullaakkut nerisimanngikkutta taquarataluunniit ulloq nukissaqarfiginngilarput, meeqqat aamma taamaapput.

Nunatsinni atuarfeqarfinni meeqqanut nerisaqartitsisalernissap qularnaatsumik aningaasalersorneqalernissaanut Demokratineersup Jens B. Frederiksenip siunnersuutaa, aamma massakkut Naalakkersuisooqatigiittut naalakkersuisooqatigiilernerminni isumaqatigiissutaanniittoq, sulili manna tikillugu piviusunngortinneqarsimanngitsoq, Inatsisartut aqagu ataatsimiinneranni oqaluuserineqassaaq.