Meeqqat ataatsimoornermik misigisaqartinniarlugit suliniuteqartut
Ullumi meeqqat ulloraat. Taamaammat NAKUUSA Børnealliancen suleqatigalugu meeqqat meeraqatiminnut videoliani naatsuni ilassisarnissaat pillugu nittartakkakkut suliniummik aallartitsivoq.
Illoqarfinni nunaqarfinnilu tamani meeqqat ataatsimoornermik misigisaqarnissaannik ersersitsinissaq suliniuteqarnermi siunertaasoq, Naalakkersuisut tusagassiuutinut nalunaarummi allapput.
- Meeqqat ulluanni NAKUUSAP aammalu Børnealliancenip meeqqat akornanni ataatsimuussusermik qitiutitsinerat nuannaarutigaara, isumaginninnermut, ilaqutariinnut inatsisinillu atuutsitsinermut naalakkersuisoq Martha Abelsen oqarpoq, nangillunilu.
- Minnerunngitsumik meeqqat namminneerlutik inuunerminnik oqaluttuartinneqarlutik ilaatinneqarnerat nuannaarutigaara. Meeqqat oqaloqatigisarnissaat eqqaamasassavarput, oqalliseriinnarnagit, Martha Abelsen oqarpoq.
