Meeqqat ajornartorsiutillit perorsaasut suliariuminaatsippaa
Tamanna allanngortinneqartariaqartoq, Perorsaasut ilinniarsimasut peqatigiiffiat PIP isumaqarpoq.
Tamannalu perorsaasunngorniat ilinniarfiannit SPS-imit taperserneqarpoq, oqaatigineqarluni perorsaasutut ilinniakkaminnik naammassinnittut immikkut piginnaasaqartassagunik ilinniarnerat sivitsorneqartariaqartoq.
Perorsaasutut ilinniarneq ukiut sisamaata affaanik sivisussuseqarpoq, perorsaasutullu ilinniarnerup nalaani siunissami suliffigerusutamut immikkut piginnaasaqalersinnaannissaq Perorsaasut Ilinniarsimasut Peqatigiiffiata siulittaasuata, Kaalina Skiftep ujartorpaa.
- Pingaaruteqartorujussuuvoq, SPS-imi aalajangersimanerusumik ilinniarnerup nalaani ilinniagaqarnissaq. Tassa faagit assigiinngitsut attupillattaqattaarnagit, aalajangersimanerusumik ilinniarneq ukiuni sisamani affaanik sivisussusilik ingerlanneqarsinnaavoq, Kaaliina Skifte oqarpoq.
Immikkullu faginik qinersisinnaalersinnaannissamik, Kaaliina Skiftep kissaatigisaa Perorsaasunngorniat ilinniarfianni pisortaagallartup Michael Juhlip soqutiginartippaa.
- Isumaqatigisinnaalluaraluarpara, taamaattoqassappalli ilinniarneq sivitsorneqartariaqarpoq, imaluunniit immikkut piginnaasalinngornissaq siunertaralugu qaavatigut ilinniaqqinneq periarfissaasinnaavoq, Michael Juhl oqarpoq.
Michael Juhl-ilu aperaarput, sooq ukiup sisamaata affaani ilinniakkap iluani ingerlanneqarsinnaannginnersoq.
- Tunngaviusumik ilisimariisassaat inissereersimasariaqarput, ilinniarnermilu toqqammavigisaq ajunngitsuusariaqarluni. Tamanna suliffiusuni allani, soorlu ilinniartitsisuni allanilu misilittagaareerpoq. Ukiut sisamat sisamaalu affaani, anguneqarsinnaasut killeqartarput, Perorsaanermik ilinniarfimmi pisortaagallartoq Michael Juhl taama oqarpoq.
Meeqqat inuusuttuaqqallu nunatsinni ulloq unnuarlu angerlarsimaffinni inissaqartinneqanngitsut Danmarkimukartinneqartarnerat perorsaasut peqatigiiffiata akuerisinnaanngilaa.
- Ajuusaarnarpoq meeqqat inuusuttuaqqallu kingumut Danmarkimut aallartinneqartalissappata. Taamaammanuna pingaaruteqartorujussuusoq siunissaq eqqarsaatigalugu ilinniartitaanerup iluani aaqqiinissaq, tamakkua Danmarkiliartitsisarnerit pinngitsoorniassagutsigit, PIP-p siulittaasua Kaaliina Skifte taama oqarpoq.
