Meeqqat aallartitat pillugit misissuisoqarnissaa piumavaa

Ministeriuneq pinngitsaalissummik maanna tunngavilersueqquneqartussanngorpoq. Doris Jakobsen, Lars-Emil Johansenip napparsimanerani Folketingimi maanna taartaagallartoq, paragraf 20 tunngavigalugu maanna apeqquteqarpoq, Lars Løkke Rasmussenilu Folketingimut nassuiaateqaqquvaa.

Misissuisitsinermik aallartitsisoqassanersoq, taamaattoqassappallu tamanna naalakkersuisunit aalajangerneqassanersoq, oktobarip ulluisa arfineq-pingajuanni saqqummerpoq. Tassa imaappoq Naalakkersuisut siulittaasuata, Kuupik Kleistip, ministeriunerullu Lars Løkke Rasmussenip tamanna aalajangiivigissavaat.

Tamannali Doris Jakobsenip qasukkaamissutiginngilaa. Misissuisoqarnissaa utoqqatsertoqarnissaalu Folketingimi pernarluni oqalugiarnermini ujartorpai. Tamannali Lars Løkke Rasmussenimit itigartinneqarpoq.

Doris Jakobsenip maanna maluginiarpaa qallunaaqqat børnehjemminut pinngitsaalisaallutik 1976 tikillugu nuutsitaasarsimanerannut misissuinissamut, Naalagaaffimmi pissutsinut aamma Isumaginninnermut minitereqarfimmit, 1 millioni koruunit immikkoortinneqarsimasut.

Tamannalu tunuliaqutaralugu aperaaq, qallunaaqqat pinngitsaalisaallutik nuutsinneqartarsimanerisa misissuivigineqarnissaannut naalakkersuisut aningaasanik immikkoortitsinerminnut suna tunngavilersuutigisinnaaneraat - illuatungaatigullu kalaaliaqqat nuutsitaasimanerisa misissuivigineqarnissaat itigartitsissutigalugu.

Ministeriuneq akinissaminut ullunik qulinik piffissalerneqarpoq.